კიდევ კარგი, რომ ოზურგეთის პოლიციის სამოქმედო არეალი სამეგრელოზე არ ვრცელდება და ამაზე უკეთესი, რომ კაცია დადიანი მეცხრამეტე საუკუნეში ცხოვრობდა, თორემ ბაყაყების მოშენების მავნე იდეისათვის ციხეში ამოაყოფინებდნენ თავს.
ოზურგეთის რაიონულმა სასამართლომ, დღეს გამართულ პროცესზე ჩინეთის მოქალაქეს ბაყაყებზე ნადირობისთვის ერთწლიანი პირობითი სასჯელი მიუსაჯა. – ინფორმაციას ამის შესახებ “გურიის მოამბე'' ავრცელებს.
გარემოს დაცვის პოლიცია აკონკრეტებს, რომ ჩინეთის მოქალაქე მდინარე სუფსაზე არა უბრალოდ ბაყაყების მონადირებისთვის, არამედ აკრძალული იარაღების, ანკესისა და ბადეხლართის გამოყენების გამო დააკავეს, მაგრამ ამ ამბის მთავარ ფიგურად ენაკვიმატ გურიაში მაინც ბაყაყი რჩება.
აღნიშნული პიროვნება, ლანჩხუთში ავტომაგისტრალის მშენებლობაზეა დასაქმებული. ის სამხრეთ ჩინეთიდანაა, სადაც ბაყაყებსა და გველებს ჩვეულებრივად საკვებად იყენებენ.
დაკავებულს ჯარიმის სახით საკმაოდ სოლიდური თანხის გადახდა მოსთხოვეს, რაზედაც მან უარი განაცხადა, სწორედ ამიტომ, მას სასჯელის სახით სასამართლოს გადაწყვეტილებით ერთწლიანი პირობითი მიუსაჯა.