განმუხურში, „ჯემ ფესტის“ ტერიტორიაზე სამართალდამცავებმა „თეთრი ხმაურის მოძრაობის“ აქტივისტი ბაქარ ყორშია დააკავეს. შინაგან საქმეთა სამინისტროს ინფორმაციით, ის სისხლის სამართლის კოდექსის 260-ე მუხლით არის დაკავებული, რაც ნარკოტიკული საშუალების უკანონოდ შეძენა-შენახვას გულისხმობს. აღნიშნული ფაქტი გუშინ, 2 აგვისტოს მოხდა. დაკავებული ყორშია ამ დრომდე ზუგდიდის სამხარეო პოლიციაში, წინასწარი დაკავების იზოლატორში იმყოფება.
მის ინტერესებს საქართველოს ახალგაზრდა იურისტთა ასოციაციის ზუგდიდის ოფისის ხელმძღვანელი იცავს. ჯემალ ჭკადუა დღეს ბაქარ ყორშიასთან იმყოფებოდა. შეხვედრის შემდეგ მან ჟურნალისტებთან კომენტარი გააკეთა. მისი თქმით, დაკავებულს ძალადობის ნიშნები არ ეტყობა, თუმცა, როგორც ჭკადუას აღნიშნავს, დაკავებულმა ბაქარ ყორშიამ მასთან საუბრისას აღნიშნა, რომ დაკავებისას ადგილი ჰქონდა სიტყვიერ და მსუბუქ ფიზიკურ შეურაცხყოფას.
საქართველოს შინაგან საქმეთა სამინიტრო პოლიციის მხრიდან ”თეთრი ხმაურის მოძრაობის” აქტივისტის, ბაქარ ყორშიას ცემის ფაქტს კატეგორიულად უარყოფს. უწყებისვე ინფორმაციით, დანიშნულია შესაბამისი ექსპერტიზაც.