,,საოკუპაციო ზონა არის მაღალი რისკის არეალი, სადაც მსგავსი ტიპის გადაადგილება საფრთხის შემცველია. ამიტომ, ჩვენ მიზანშეწონილად არ მიგვაჩნია საზოგადოებრივი მოძრაობის – „ძალა ერთობაშია“ ინიციატივის განხორციელება'' – ნათქვამია შინაგან საქმეთა სამინისტროს განცხადებაში ყარაფილა-ბერშუეთის მონაკვეთზე სამოქალაქო პატრულირების დაწყებასთან დაკავშირებით.
"ჩვენი უწყების წარმომადგენლებმა აქციის ორგანიზატორებს განუმარტეს ის რისკები და გამოწვევები, რომლებიც მათ ინიციატივას უკავშირდება. აღსანიშნავია, რომ საოკუპაციო ზოლთან ინტენსიურად მუშაობენ ევროკავშირის სადამკვირვებლო მისია და შსს-ს დანაყოფები, რომლებიც ხელს უწყობენ ადგილობრივი მოსახლეობის უსაფრთხო გარემოში ცხოვრებას და მონიტორინგის შესაბამისი ფუნქციებით არიან აღჭურვილნი.
შეგახსენებთ, ყარაფილა-ბერშუეთის მონაკვეთზე საოკუპაციო ხაზთან დღეს სამოქალაქო პატრულირება დაიწყო. უკვე გამოსულია პატრულირებაზე პირველი 3-კაციანი ჯგუფი. ცნობილია რომ პატრულირება იქნება მუდმივი.
სამოქალაქო პატრულირების ინიციატორის, დავით ქაცარავას განმარტებით, ოკუპაციის შეჩერების მიზნით, საინიციატივო ჯგუფი ყველაფერს გააკეთებს. მისივე თქმით, მოქალაქეებს კარგად აქვთ გააზრებული, რომ შესაძლოა ისინი რუსეთის ჯარების სამიზნეები გახდნენ, თუმცა უკან დახევას არ აპირებენ.
'