საქართველოს პრემიერმინისტრი ირაკლი ღარიბაშვილი განცხადებას ავრცელებს და სხვადასხვა ვერსიაზე საუბრობს, რომლებიც, მისი თქმით, ქვეყანაში მიხეილ სააკაშვილის დაბრუნების შემდეგ გაჩნდა. მისი თქმით, სახელდება რამდენიმე ვერსია, მაგრამ მათგან არასწორად მიიჩნევს იმას, რომ მიხეილ სააკაშვილი დაბრუნდა, რათა ციხეში ჩამჯდარიყო.

პრემიერმინისტრი წერს ასევე, რომ მიხეილ სააკაშვილის მდგომარეობა კარდინალურად შეიცვალა მას შემდეგ, რაც ციხეში შევიდა.

“მიხეილ სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა. „ნაციონალურ მოძრაობაში“ შფოთავენ, რომ მათი ლიდერი მძიმე მდგომარეობაშია და ციხიდან დაუყოვნებლივ გაყვანას ითხოვენ. ამბობს, რომ ის არც მერაბიშვილია და არც ახალაია და ციხეში დიდხანს დარჩენას ვერ შეეგუება. სააკაშვილის ეს მდგომარეობა გუნდში მძიმედ მიიღეს, თუმცა, არც იციან, რა უნდა მოიმოქმედონ”, – წერს ირაკლი ღარიბაშვილი.

ამავე განცხადებაში ირაკლი ღარიბაშვილი ჭორების სახით გავრცელებულ ვერსიებსაც იშველიებს, თითქოსდა მიხეილ სააკაშვილის ნარკოდამოკიდებულების შესახებ.

“ზოგი ფიქრობს, რომ ხელისუფლების გადატრიალების განზრახვით დაბრუნდა, რის წარმატებაშიც ღრმად იყო დარწმუნებული. საუბრობენ იმაზეც, რომ ნარკოტიკებზე მძიმე დამოკიდებულების ფონზე, თავისი გადაწყვეტილების შედეგების გათვლა გაუჭირდა”.

ირაკლი ღარიბაშვილი ნაციონალურ მოძრაობას “კრიმინალური მიდრეკილებების მქონე ხელმოცარულ ადამიანთა ჯგუფად” მოიხსენიებს და წერს, რომ ენმ ხელისუფლებაში გადატრიალების შედეგად მოვიდა:

„ნაციონალურმა მოძრაობამ“ ძალაუფლება ხელისუფლების გადატრიალების გზით მოიპოვა – ღარიბაშვილი

მისივე თქმით, მიხეილ სააკაშვილმა ისეთივე “წარმატებით” დაგეგმა გადატრიალება, როგორი “წარმატებითაც” ქვეყანას მართავდა.

გადატრიალება ისეთივე „წარმატებით“ დაგეგმა, როგორი „წარმატებითაც“ ქვეყანას მართავდა – ღარიბაშვილი სააკაშვილზე