„უნდა შეიცვალოს არა მარტო ნარკოპოლიტიკა, არამედ თვითონ პოლიციის რეპრესიული მანქანა. უნდა დაინგრეს ეს სისტემა. მე ვთვლი, რომ აუცილებლად საჭიროა ფართომასშტაბიანი ამნისტია, იმიტომ რომ არიან ადამიანები, ვინც ნარკოპოლიტიკის გამო არ ზიან მარტო, ზიან იარაღის გამო და ციხე სავსეა ასეთი ადამიანებით. ასე რომ, უნდა შეიცვალოს თვითონ ეს მანქანა,“ – ეს განცხადება ნარკოდანაშაულში ბრალდებულმა თორნიკე კაჭარავამ წინასწარი პატიმრობიდან გათავისუფლების შემდეგ გააკეთა.
პრეზიდენტის შვილის, ანა მარგველაშვილის მეგობარი აცხადებს, რომ ნარკოპოლიტიკის შეცვლასთან ერთად, პოლიციის დამოკიდებულება და ქმედებებიც უნდა შეიცვალოს.
"ჩვენ გვახსოვს, წინა ხელისუფლება ამის გამო შევცვალეთ და მე დარწმუნებული ვარ, რომ ახალი ხელისუფლება მიხვდება თავის შეცდომებს," – განაცხადა თორნიკე კაჭარავამ.
პრეზიდენტის შვილი, ანა მარგველაშვილი აცხადებს, რომ სასამართლომ თორნიკე კაჭარავას უდანაშაულობა დაამტკიცა.
„დანაშული იყო მათი მხრიდან და ეს დანაშაული დადასტურდა, ჩვენი უდანაშაულობაც დადგინდა. მნიშვნელოვანია, რომ სასამართლო ობიექტური იყოს და მიხარია, რომ ასეც არის,“ – განაცხადა ანა მარგველაშვილმა.
თორნიკე კაჭარავა წინასწარი პატიმრობიდან სასამართლომ 15 ათასი ლარის ოდენობის გირაოს სანაცვლოდ გაათავისუფლა. პრეზიდენტის შვილისა და სიძის მეგობარს დიდი ოდენობით ნარკოტიკის შეძენა-შენახვაში ადანაშაულებენ.