ამერიკის შეერთებული შტატების საელჩო საქართველოში 2001 წლის 11 სექტემბრის ტერაქტს „ფეისბუკის“ ოფიციალურ გვერდზე გამოეხმაურა.

განცხადებაში  ნათქვამია, რომ დღეს არის იმ თავდასხმების 20 წლისთავი, რომელმაც ამერიკის შეერთებული შტატები სამუდამოდ შეცვალა. საელჩოს თანახმად, 2001 წლის 11 სექტემბრის კადრებმა წარუშლელი კვალი დატოვა, თუმცა ამასთანავე მოიტანა არნახული საერთაშორისო ერთიანობა ტერორიზმის წინააღმდეგ, რათა ტერორისტების საწვრთნელი ბანაკების აღმოფხვრით, მსგავსი თავდასხმები აღარასოდეს მომხდარიყო.

„ჩვენ სამუდამოდ მადლიერნი ვართ ჩვენი მოკავშირეებისა და პარტნიორების, რომლებიც ავღანეთში გვერდში დაგვიდგნენ სამხედრო, დიპლომატიურ და ჰუმანიტარულ მისიებში, კონკრეტულად კი – საქართველოსი, რომელმაც 20,000-ზე მეტი სამხედრო ჩართო ოპერაციებში და განსაკუთრებული როლი ითამაშა საევაკუაციო ფრენების მხარდაჭერაში.

როგორც გასული ორი ათწლეულის განმავლობაში, გთხოვთ, შემოგვიერთდეთ, რათა პატივი მივაგოთ 2,977 უდანაშაულო კაცის, ქალისა და ბავშვის ხსოვნას, რომელიც 11 სექტემბრის თავდასხმებს შეეწირა“, – აღნიშნულია საქართველოში აშშ-ის საელჩოს განცხადებაში.