2001 წლის 11 სექტემბერს, „ალ-ყაიდის“ თვითმკვლელმა ტერორისტებმა გატაცებული თვითმფრინავებით თავდასხმები განახორციელეს ნიუ-იორკში, მსოფლიო სავაჭრო ცენტრის ცათამბჯენებსა და ვაშინგტონთან მდებარე პენტაგონის შენობაზე. მეოთხე გატაცებული თვითმფრინავი, სადაც ტერორისტებს წინააღმდეგობა გაუწიეს ეკიპაჟის წევრებმა და მგზავრებმა, პენსილვანიის შტატში ჩამოვარდა.
დღეს თეთრმა სახლმა განაცხადა, რომ დადგინდა 11 სექტემბრის ტერაქტებისას დაღუპული კიდევ ორი ადამიანი. ისინი ნიუ-იორკის სასამართლო ექსპერტიზის ინსტიტუტის ექსპერტებმა დნმ-ის სეკვენირების ახალი ტექნოლოგიების გამოყენებით ამოიცნეს
იდენტიფიცირებულია მსოფლიო სავაჭრო ცენტრზე თავდასხმისას დაღუპული დოროთი მორგანი, რომელიც ცენტრის ჩრდილოეთ კოშკის 94-ე სართულზე მდებარე ერთ-ერთ სადაზღვევო კომპანიაში მუშაობდა და მამაკაცი, რომლის ვინაობას მისი ოჯახის თხოვნით არ ასაჯაროებენ.