დემოკრატიის კვლევის ინსტიტუტი საარჩევნო სუბიექტებს მოუწოდებს, წინასაარჩევნო პერიოდში თავი შეკავონ რელიგიით მანიპულირებისგან. ორგანიზაციის განცხადებით, მმართველი პარტიის წევრების ვიზიტები ტაძრებსა და სამლოცველოებში არჩევნების დანიშვნის დღიდან განსაკუთრებით ინტენსიური გახდა, რაც 2021 წლის ადგილობრივი თვითმმართველობის არჩევნებს შეიძლება უკავშირდებოდეს.
მათივე თქმით, წინასაარჩევნო კამპანიის ფარგლებში, მთავრობის მეთაური, ირაკლი ღარიბაშვილი ქართული ოცნების პოლიტიკური თანამდებობის პირებთან ერთად ტაძრებსა და სამლოცველოებს ხშირად სტუმრობს. ორგანიზაციის ინფორმაციით, არჩევნების დანიშვნის დღიდან, ირაკლი ღარიბაშვილი თანაპარტიელებთან ერთად სასულიერო პირებს ექვსჯერ შეხვდა.
“დემოკრატიის კვლევის ინსტიტუტი მიიჩნევს, რომ საარჩევნო სუბიექტების მხრიდან რელიგიური ორგანიზაციებისა და კონკრეტულ სასულიერო პირთა გავლენების გამოყენების მცდელობა წარმოადგენს მანკიერ პრაქტიკას და უარყოფითად აისახება არჩევნების შედეგებზე”, — წერია დემოკრატიის კვლევის ინსტიტუტის განცხადებაში.