სახალხო დამცველის ნინო ლომჯარიას განცხადებით, მან გამოიყენა სახალხო დამცველის უფლებამოსილ;ება და უკვე მიმართა მთავარ პროკურატურას, რათა დაიწყოს სისხლის სამართლებრივი დევნა “ალტ ინფოს” წარმომადგენლის ზურაბ მახარაძისა და სასულიერო პირის, დეკანოზ სპირიდონ ცქიფურიშვილის მიმართ.
სახალხო დამცველის განცხადებით, პროკურატურისთვის მიმართვის საფუძველი გახდა მედიით გასული მასალებისდ ანალიზი, საიდანაც ცხადი ხდება, რომ ზურაბ მახარაძე 5 ივლისამდე და 5 ივლისსაც მონაწილეობდა ძალადობრივი ჯგუფების ორგანიზებაში, ხოლო უშუალოდ 5 ივლისს დეკანოზმა ცქიფურიშვილმა, ხმის გამაძლიერებლის მეშვეობით მოუწოდა შეკრებილებს ძალადობისკენ.
სახალხო დამცველის განცხადებით, შეშფოთებას იწვევს ის ფაქტი, რომ 5 ივლისის მოვლენებთან დაკავშირებით ჯგუფური ძალადობის შესახებ ბრალდება ჯერჯერობით არავისთვის წაუყენებიათ, იმის მიუხედავად, რომ მედიაში გაშუქებული მასალების ანალიზის შემდეგ ამგვარი ბრალდების ადრესატები აშკარად გამოკვეთილია.