ოკუპაცია არის ხელისუფლებისთვის პირველი საკითხი ყველა შეხვედრაზე – ეს განცხადება, საქართველოს პრემიერმინისტრმა გიორგი კვირიკაშვილმა გააკეთა. პრემიერმა ოპონენტების მიერ გამოთქმულ კრიტიკას უპასუხა, რომელიც ოკუპაციასთან მიმართებაში საქართველოს ხელისუფლების უმოქმედობას ეხებოდა.
გიორგი კვირიკაშვილი ამბობს, რომ მმართველ გუნდს ოკუპირებულ ტერიტორიებზე შექმნილი ვითარება მეორე-მესამე პლანზე არ გადაუწევია და ამ საკითხის საერთაშორისო დონეზე განხილვას განაგრძობს.
კვირიკაშვილის თქმით, სწორედ რუსული ოკუპაცია იყო შეერთებული შტატების ვიცე პრეზიდენტთან შეხვედრაზე მთავარი განსახილველი თემა.
„ჩვენს ხელისუფლებას არცერთი წუთი არ გაუტარებია, რომ ეს საკითხი არ ყოფილიყო ნომერ პირველი ჩვენს დღის წესრიგში. ჩვენი ოპონენტები ამაზე ავრცელებენ ჩვენს პარტნიორებთან აბსოლუტურად უსაფუძვლო ჭორებს, რომ ჩვენ ეს საკითხი თითქოსდა აღარ გვაქვს პირველი და მათი სხვადასხვა გამოკითხვის მეშვეობით ცდილობენ, რომ ეს საკითხი გადაიტანონ მეორე, მესამე და ა.შ. შრეში. აშშ-ის ვიცე პრეზიდენტთან საუბრისას, ეს იყო ჩემი ერთ-ერთი უმთავრესი თემა,“ – აცხადებს გიორგი კვირიკაშვილი.
პრემიერი ამბობს, რომ ოკუპაცია არის მძიმე მემკვიდრეობა, რომელიც „ქართული ოცნების“ მთავრობამ მიიღო. მისივე თქმით, ხელისუფლება გადადგამს იმ ნაბიჯებს, რომელიც პრობლემას მშვიდობიანად მოაგვარებს.
„ჩვენ აუცილებლად გადავდგამთ იმ ნაბიჯებს, რომელიც მიგვიყვანს საქართველოს ერთიანობამდე. რა თქმა უნდა, მშვიდობით, მხოლოდ და მხოლოდ მოლაპარაკებების გზით,” – განაცხადა გიორგი კვირიკაშვილმა.