ოკუპირებულ აფხაზეთში  მორიგი სკანდალი აგორდა – ე.წ.  მინისტრთა კაბინეტის აპარატის იურიდიული განყოფილების უფროსის ლაშა ცაავას ოჯახი დააყაჩაღეს.  

 

აფხაზეთის დე-ფაქტო გენპროკურატურის პრესსამსახურის ცნობით, 2 ივლისს, საღამოს დაახლოებიტ 23 საათსა და 30 წუთზე ოთხი ნიღბიანი და ავტომატითა და პისტოლეტებით შეიარაღებული პირი, რომელთა ვინაობა ჯერჯერობით დაუდგემელია,  შეიჭრა სოხუმში, ძიძარიას ქუჩაძე მდებარე ცაავების სახლში და იარაღის მუქარით გაიტანა დიდძალი ოქროულობა და 75 ათასი რუსული რუბლი, აკმ მარკის ავტომატი ,,კალაშნიკოვი ‘’ და ეზოში მდგარი ავტომანქანით, რომელიც ასევე ლაშა ცაავას  კუთვნილებაა,  გაუჩინარდა შემთხვევის ადგილიდან . 

საქმე აღძრულია აფხაზეთის ე.წ.  სისხლის სამართლის კოდექსის 159 – ე მუხლის მეოთხე ნაწილის ბ პუნქტით, რაც გულისხმობს ყაჩაღურ თავდასხმას განსაკუთრებით დიდი ოდენობის ქონების დაუფლების მიზნით.

 

 აფხაზეთში შექმნილი უკიდურესად მძიმე კრიმინალური  მდგომარეობითა და კლანურ- მაფიოზური ჯგუფების თარეშით აღშფოთებული ოპოზიციისა და საზოგადოების მძლავრი საპროტესტო განწყობის ფონზე კრიმინალის ეს მორიგი გამოხდომა კარგს არაფერს უქადის აფხაზეთის ხელისუფლებას, რომელსაც ,,ამცახარამ'' საზოგადოების სახელით უკვე წაუყენა ულტიმატუმი, რომ თუ უახლოეს ათ დღეში ვითარება არ შეიცვალა, ხალხს ქუჩაში გაიყვანს მისი გადადგომის მოთხოვნით.

ფაქტი რეზონანსულია იმ თვალსაზრისით, რომ თავდასხმა ხდება ხელისუფლების მაღალჩინოსანზე, რაც მიუთითებს ხაჯიმბას მმართველობის უსუსურობასა და უუნარობაზე  დაიცვას არათუ მოსახლეობა, საკუთარი თავიც კი.