რამაზ ჩხიკვაძე მიმდინარე წელს, სპეცოპერაციის შედეგად საკუთარ საცხოვრებელ სახლში, საკუთარი ტრაქტორით, საკუთარი ყანის დახვნის მცდელობისას დააკავეს. სპეცოპერაცია შსს გურიის პოლიციის დეპარტამენტის თანამშრომლებმა ჩაატარეს, დაკავების ოპერაციას ადგილობრივი პოლიციის უფროსი ხელმძღვანელობდა.
ოზურგეთის რაიონულმა სასამართლომ რამაზ ჩხიკვაძის საქმის განხილვა დაიწყო. ჩხიკვაძეს გამოძიება კანონის დარღვევას ედავება და მის ორწლიან პატიმრობას ითხოვს. ჩხიკვაძეს ბრალი წაყენებული აქვს სსკ 381 მუხლით, რაც სასამართლო გადაწყვეტილების დაუმორჩილებლობას გულისხმობს.
საქმე ისაა, რომ, როგორც შსს-ში აცხადებენ, ჩხიკვაძე ადრე გასამართლებული იყო 260 მუხლით, მას დაუდგინდა ნარკოტიკული თრობა, რის გამოც 5 წლის განმავლობაში აეკრძალა სატრანსპორტო საშუალებების მართვა, თუმცა პოლიციამ დანაშაულის ჩადენის ფაქტზე დააკავა, როცა ის ტრაქტორს მართავდა".
რამაზ ჩხიკვაძე 38 წლისაა, ტრაქტორისტი, ჩოხატაურის მუნიციპალიტეტის სოფელ ჩაისუბანში ცხოვრობს.