ბერლინში საგანგებო სიტუაციაა გამოცხადებული – დიდი სიცხეების შემდეგ გუშინ მოსული ინტენსიური წვიმის შედეგად გერმანიის დედაქალაქი დატბორილია. უხვმა ნალექმა ბერლინის ქუჩებში მოძრაობის პარალიზება გამოიწვია. არაოფიციალური ინფორმაციით, სტიქიას ორი ადამიანი ემსხვერპლა.
სამაშველო სამსახურის ცხელ ხაზზე მოქალაქეების მხრიდან, დახმარების თხოვნით 3000-მდე ზარი შევიდა. დროებით დაიხურა ავტობანი ქაიზერდამსა და შპანდაუერი დამს შორის, გარკვეული პერიოდის განმავლობაში მუშაობა შეაჩერა საერთაშორისო აეროპორტმაც, თუმცა ამ დროისთვის რეისები უკვე აღდგა.
გერმანული მედიის ინფორმაციით, განსაკუთრებული ზიანი ქვეყნის ჩრდილოეთ ნაწილს მიადგა. შტორმის, სეტყვისა და ძლიერი ქარის შედეგად დაზიანდა ინფრასტრუქტურა.