ზაფხულის დადგომასთან ერთად ზუგდიდის მუნიციპალიტეტის სოფელ . ცაიშის მოსახლეობა  შესაძლოა საფრთხის წინაშე დადგეს. ადგილობრივები, რომლებმაც აღნიშნული პრობლემის გაშუქება გვთხოვეს, საუბრობენ, რომ მათ ზაფხულის დადგომასთან ერთად საფრთხე ექმნებათ, როგორც ისინი აცხადებენ, მათ სიახლოვეს განთავსებულია ნაგავსაყრელი, ზაფხულში მომრავლებულია სხვადასხვა დაავადებების გადამტანი  მწერები,  არის გაუსაძლისი სუნი, ანტისანიტარია, მომრავლებულია უპატრონო ძაღლები,  რომლებიც ანადგურებენ შინაურ ფრინველებსა თუ ცხოველებს, მათი თქმით ძაღლები და მწერები საფრთხეს უქმნის პატარა ბავშვებს.  ცაიშის ნაგვასაყრელზე არსებული ანტისანიტარიის შესახებ საკითხი ზუგდიდის მუნიციპალიტეტის რიგგარეშე სხდომაზე დააყენა საკრებულოს მაჟორიტარმა დეპუტატმა ერთიანი ნაციონალური მოძრაობიდან, გოდერძი კუკავას თქმით მოსახლეობა გაუსაძლის მდგომარეობაშია და აუცილებელია პრობლემის მოგვარება. ტელეკომპანია „ოდიში“ დაინტერესდა ცაიშის ნაგავსაყრელზე არსებული მდგომარეობით, ჩვენ ვცადეთ ნაგავსაყრელში შესვლა ,თუმცა ამის უფლება არ მოგვეცა, მყარი ნარჩენების მართვის კომპანიაში განგვიცხადეს, რომ აღნიშნული ტერიტორია იყო საფრთხის შემცველი და სპეციალური აღჭურვილობის გარეშე იქ შესვლა ეკრძალება ყველას თუმცა, ჩვენმა კამერამ დააფიქსირა ნაგავსაყრელის ტერიტორიაზე   ყოველგვარი სპეციალური ტანსაცმლის გარეშე მომუშავე  ადამიანები.მყარი ნარჩენების მართვის კომპანიაში  აცხადებენ, რომ მიმდინარეობს შეწამვლითი პროცესები და მოსახლეობას შიშის საფუძველი არ აქვს.ნაგავსაყრელი ფაქტიურად ორ სოფელს ცაიშსა და დიდინეძს ესაზღვრება. ადგილობრივები ამბობენ, რომ აქ ცხოვრება პრაქტიკულად შეუძლებელია და ხელისუფლებამ ადეკვატური ზომები დროულად უნდა მიიღოს.