დაავადებათა კონტროლის ეროვნული ცენტრის წარმომადგენელი, ინფექციონისტი ამირან გამყრელიძე აცხადებს, რომ არაა გამორიცხული, მოქალაქეთა ნაწილი შეგნებულად ჯავშნიდეს აცრისთვის ადგილს, შემდეგ კი ჯავშანს აუქმებდეს.

“გუშინ 3 000-მდე ადამიანი არ გამოცხადდა აცრაზე, ვსწავლობთ მიზეზებს, შეიძლება, გარკვეული ნაწილი მიზანდასახულად ჯავშნის ადგილს და აუქმებს,”-განაცხადა ამირან გამყრელიძემ.

მისივე თქმით, დღეს უკვე ნახევარ მილიონზე მეტი, 523 000 აცრაა ქვეყანაში ჩატარებული.

„აქედან სრულად, ანუ ორჯერადად აცრილია 165 000 ადამიანი, რაც მოზრდილი მოსახლეობის 5.8 პროცენტს შეადგენს. გუშინ 24 საათში გვქონდა 16 677 აცრა. მნიშვნელოვანი მიგნებაა ბოლო ორი დღის ასევე ის, რომ გუშინ გვქონდა ჩვენ 19 000 ჯავშანი და დაახლოებით 3 000-მდე ადამიანი არ გამოცხადდა აცრაზე ან არ ჩაიტარა აცრა. ამიტომ ახლა ჩვენ, ჩვენს აიტი სამსახურებთან ერთად ვსწავლობთ ამას, გაუქმების მიზეზები რა იყო. ესეც მნიშვნელოვანია, რადგანაც შეიძლება, რაღაც ეჭვი იყოს, რომ ადამიანების გარკვეული ნაწილი მიზანდასახულად ჯავშნის აცრებს და შემდეგ მას აუქმებს. თუმცა, არის მეორე, რომ რადგან ინფიცირების მაჩვენებელი მაღალი გვაქვს, შეიძლება, ადამიანები ინფიცირდებიან და მერე აღარ მიდიან აცრებზე. ან ჰქონდა მესამე მიზეზი, რომ დაჯავშნული ჰქონდათ, მაგალითად, „სინოფარმზე“ და შემდეგ ამოეწერნენ, გადაჯავშნეს „ფაიზერზე“”, – თქვა ამირან გამყრელიძემ.

აქვე გეტყვით, რომ აცრისთვის ადგილების ორგანიზებულად დაჯავშნისა და შემდეგ დაჯავშნილი ადგილების ასევე, ორგანიზებულად გაუქმების შესახებ მოწოდებები “ფეისბუქზე” აქტიურად ვრცელდებოდა.