განსახლება და ალტერნატიული ფართით დაკმაყოფილება – ეს ის მოთხოვნებია, რომელიც ზუგდიდში, ე.წ ფაიფურის დასახლებაში, ზდუ-ს ყოფილ შენობაში მცხოვრებ იძულებით გადაადგილებულ პირებს აქვთ. დაახლოებით 30 დევნილი ოჯახი აქ წლების განმავლობაში გაუსაძლის პირობებში ცხოვრობს. კორპუსის მაცხოვრებლები ამბობენ, რომ ამ დღეების გადაუღებელმა წვიმებმა მათ საცხოვრებელ ოთახებს პრობლემები შეუქმნა, რადგან უვარგისი სახურავი წყალს ატარებს. შედეგად ზიანდება კედლები, იატაკი და საყოფაცხოვრებო ნივთები. დევნილები ამბობენ, რომ მძიმე და გაუსაძლისი ვითარების გამო რამდენიმე ოჯახმა საცხოვრებელი დატოვა.
"ვესაუბრეთ დევნილთა სამმართველოს ხელმძღვანელს მანუჩარ ჩილაჩავას, გვითხრა, რომ შეგვხვდებოდა, თუმცა ნახევარ საათში გვითხრა რომ ვერ იცლიდა, რადგან თბილისში გაემგზავრა. კორპუსში წყალიც არ გვაქვს, რადგან 200 ლარია გადასახდელი და გამოგვირთეს. არც ელექტროენერგია გვაქვს. სახურავიდან ჩამოსულმა წყალმა სადენები დააზიანა, რის გამოც შუქი ითიშება. ამასთან, ერთ-ერთ აქაურ მაცხოვრებელს დენმა დაარტყა და საწყალი ძლივს გადარჩა. აქ ჩვენ არ გვაქვს ცხოვრების ელემენტარული პირობები" – განაცხადა აფხაზეთიდან დევნილმა ეკა ჯიჯავამ.
ზუგდიდის დევნილთა სამმართველოში აღნიშნულთან დაკავშირებით კომენტარი არ კეთდება. უწყების ხელმძღვანელმი მანუჩარ ჩილაჩავა ჟურნალისტების ზარს არ პასუხობს. მედიის წარმომადგენლებს ის არც ოფისში შეხვედრია.