თბილისის მეტროს ახალი სადგურის “უნივერსიტეტის” მშენებლობა ჯერ არ დასრულებულა. სატრანსპორტო კომპანიაში აცხადებენ, რომ მშენებლობის დასრულების შემდეგ მეტროსადგური რამდენიმე კვირა სატესტო რეჟიმში იმუშავებს, სექტემბრიდან კი მოქალაქეებს მოემსახურება.
სოციალური ქსელის მომხმარებელმა მირზა გოგოჭურმა მეტროსადგურის სურათები გამოაქვეყნა, რომელსაც საზოგადოების მხრიდან არაერთგვაროვანი რეაქცია მოჰყვა. მათი დიდი ნაწილი ახალ მეტროსადგურს აბაზანას ადარებს.
თბილისის 23-ე მეტროსადგურის სამშენებლო სამუშაოები 2015 წელს განახლდა. ეს მეტროსადგური 1995 წელს უნდა გახსნილიყო, თუმცა, მშენებლობა შეჩერდა. სამშენებლო სამუშაოების ღირებულება 83 მილიონი ლარია.
ფოტო: მირზა გოგოჭური