ზუგდიდის მუნიციპალიტეტის სოფელ შამგონის მოსახლეობა მდინარე ენგურის სანაპიროზე ქვა-ღორღის ამოღებას აპროტესტებს. ადგილობრივების განცხადებით, ერთ-ერთი კერძო კომპანიას ადგილიდან ქვა-ღორღი და ქვიშა მიაქვს და სამუშაოებს მდინარეში აწარმოებს. ამის შსახებ ადგილობრივმა მოსახლეობამ დღეს ენგურის სანაპიროსთან იმ ადგილას განაცხადეს, სადაც მათი თმით, აღნიშნული სამუშაოები მიმდინარეობს. შამგონელების განმარტებით, შედეგად სოფელს ზიანი ადგება – გათხრებით საძოვრების მიტაცება ხდება, ამასთან, მდინარის ადიდების შემთხვევაში ტერიტორია იტბორება, რაც ეკოლოგიურ საფრთხეს ქმნის.
"კარიერების ამოღების შემთხვევაში, ძალიან ცუდი შედეგები მოყვება ამას, ამიტომაც მოსახლეობა ითხოვს, რომ კარიერები სხვა ადგილას გადაიტანონ. შამგონელები ამას არ დათმობენ" – ამბობენ შამგონელები.
სოფელ შამგონის მოსახლეობის აქციას დღეს „ერთიანი ნაციონალური მოძრაობის“ წევრებიც შეუერთდნენ. პარტიის ადგილობრივი ორგანიზაციის თავმჯდომარის ანა წითლიძის განცხადებით, სამუშაოების ჩატარებაში ხელისუფლების ინტერესები იკვეთება.
„გაუგებარია, რა მოტივით და რის საფუძველზე გასცა გარემოს დაცვის სამინისტრომ ნებართვა აღნიშნულ სამუშაოებთან დაკავშირებით. პრაქტიკულად მოსახლეობა ტერიტორიის დატბორვის საშიშროების წინაშე დგას. ჩვენ ამ პროცესს ვეწინააღმდეგებით და მხარს ვუჭერთ მოსახლეობის მოთხოვნებს“ – განაცხადა წითლიძემ.
საპროტესტო აქციის მსვლელობას შეუერთდა აღნიშნული სამუშაოების მწარმოებელი კომპანიის "TNT გრუპის" ხელმძღვანელი მანუჩარ ჩანგელია. მისი თქმით, მას აქვს შესაბამისი ლიცენცია გარემოს დაცვის სააგენტოს მიერ გაცემული.
„სამუშაოებს თითქმის ორი თვეა ვაწარმოებთ, ღია აუქციონზე შევიძინე ლიცენზია ქვა-ღორღის მოპოვებაზე“ – განაცხადა ჩანგელიამ.
რაც შეეხება სამეგრელო-ზემო სვანეთის გუბერნატორის პასუხს გაკეთებულ ბრალდებებთან დაკავშირებით – რწმუნებულის ადმინისტრაციაში აცხადებენ, რომ ბრალდება აბსურდია და ლევან შონიას ამ საქმესთან დაკავშირებით არავითარი კავშირი არ აქვს.