გუშინ მთავრობის კანცელარიაში საქართველოს პრემიერ-მინისტრმა ირაკლი ღარიბაშვილმა ჟურნალისტებს საპარტნიორო ფონდის ახალ ხელმძღვანელად საპარლამენტო უმრავლესობის ლიდერი დავით საგანელიძე წარუდგინა.
დავით საგანელიძემ საპარტნიორო ფონდის თავმჯდომარის თანამდებობაზე გადასვლასთან დაკავშირებით პარლამენტის წევრის მანდატი უნდა დათმოს, შესაბამისად მისი ჩანაცვლება მოხდება საარჩევნო სიაში ადგილომონაცვლე კანდიდატის მიერ.
საგანელიძის ადგილმონაცვლე საარჩევნო სიის მიხედვით ზუგდიდის გამგებელი ედიშერ თოლორაიაა, თუმცა გარკვეული არ არის დაიკავებს თუ არა იგი დეპუტატის ადგილს პარლამენტში – გუშინ გავრცელეული ცნობით, იგი, არ აპირებს დატოვოს ზუგდიდის გამგებლის თანამდებობა, რადგან, მისი აზრით, ეს იქნება უპატივცემლობა მოსახლეობისადმი, რომელმაც იგი გამგებლად აირჩია.
იმ შემთხვევაში, თუ ედიშერ თოლორაია უარს განაცხადებს დეპუტატის მანდატზე, შესაძლოა ეს ადგილი დაიკავოს ვლადიმერ აჩბამ, რომელიც თოლორაიას მომდევნო კანდიდატია საარჩევნო სიაში.
პარლამენტში დავით საგანელიძის ადგილმონაცვლის საკითხი ჯერ ცესკო-მ უნდა განიხილოს და შემდეგ კანდიდატურა პარლამენტს წარუდგინოს.