გიგა ოთხოზორიას მკვლელობაში ბრალდებულ რაშიდ კანჯი ოღლის წინააღმდეგ დე ფაქტო აფხაზეთის ხელისუფლებამ სისხლის სამართლებრივი დევნა შეწყვიტა. ამის შესახებ დღეს ენგურის ხიდზე, სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილემ ჟურნალისტებს გალში ინციდენტების პრევენციისა და მათზე რეაგირების მექანიზმების ფარგლებში გამართული მორიგი შეხვედრის დასრულების შემდეგ განუცხადა. კახაბერ ქემოკლიძის განცხადებით, დე ფაქტო ხელისუფლების წარმომადგენლების ინფორმაციით, რაშიდ კანჯი ოღლი შიდა პატიმრობაშიც აღარ იმყოფება.
სახელმწიფო უსაფრთხოების სამსახურის ანალიტიკური დეპარტამენტის უფროსის მოადგილის, კახაბერ ქემოკლიძის ინფორმაციით, დღევანდელ შეხვედრაზე დე ფაქტო აფხაზეთის ამ გადაწყვეტილებაზე უკმაყოფილება გამოთქვეს. მისივე თქმით, ამ საკითხზე საუბრები გაგრძელდება როგორც გალის, ასევე ჟენევის საერთაშორისო მოლაპარაკების ფორმატში.
დე ფაქტო აფხაზეთის მიერ რაშიდ კანჯი ოღლის წინააღმდეგ სისხლის სამართლებრივი დევნის შეწყვეტის შესახებ ინფორმაცია მედიის საშუალებით გაიგო გიგა ოთხოზორიას დედამ. ჯულიეტა ბერულავას გაცხადებით, აღნიშნული გადაწყვეტილება ქართული მხარის სუსტი მუშაობის შედეგია.
გიგა ოთხოზირიას დედა ამბობს, რომ მისი შვილი არა სურსათის გადატანისთვის მოთხოვნილი თანხის გამო დაწყებული კამათისას მოკლედ, არამედ მან რუსს ე.წ მესაზღვრეს არ აპატია ქართული პასპორტის შეურაცხყოფა. გარდაცვლილის დედა მოითხოვს საქმის ხელახლა გამოძიებას რათა დადგინდეს მკვლელობის მიზეზი, ასევე სისხლის სამართლის საქმე აღიძვრას იმ სამ პირზე, რომლებიც, ჯულიეტა ბერულავას თქმით, მისი შვილის მკვლელობაში მონაწილეობდნენ.
გიგა ოთხოზორია ერთი წლის წინ, 19 მაისს ხურჩის ე.წ სასაზღვრო გამშვებ პუნქტთან მოკლეს. მკვლელობაში ბრალდებულ რაშიდ კანჯი ოღლის წინააღმდეგ განზრახ მკვლელობის ფაქტზე სისხლის სამართლებრივი დევნა დაიწყო. მასზე ძებნა ინტერპოლის მიერ წითელი ცირკულარით გამოცხადდა.