"ერთი კვირის წინ მოგვთხოვეს დაგვეტოვებინა სტუდია, სადაც ჩვენი გადაცემის ჩაწერა მიმდინარეობდა. მიზეზად სტუდიის სხვა ტელეკომპანიის მიერ შესყიდვა დაგვისახელეს. დღეს კი ახალ სტუდიაში, სადაც ჩვენი გადაცემის მასალები მზადდებოდა, გამოგვირთეს ელექტროენერგია. ჩვენ მაინც გავალთ ეთერში, გენერატორით და სანთლების შუქზეც რომ მოგვიწიოს გადაღება", – წერს მიხეილ სააკაშვილი თავის პირად "ფეისბუქზე".
საქართველოს მესამე პრეზიდენტს, უკრაინის ოპოზიციის ლიდერს მიხეილ სააკაშვილს გუშინ ვილკოვოში მოსახლეობასთან შეხვედრის ასარევად კაცი მიუგზავნეს, ამჯერად მისი გადაცემის ჩაშლა სცადეს და სტუდიაში დენი გამოურთეს.
შეგახსენებთ, რომ ცოტა ხნის წინ მიხეილ სააკაშვილმა ტელეკომპანია "ზიკის" ეთერში პოლიტიკური თოქშოუს წამყვანობაც შეითავსა და უკრაინაში აქტუალურ ისეთ მოვლენებს აშუქებს, რომელსაც ხელისუფლება უყურადღებოდ ტოვებს.