შვიდი ქალაქი ზუგდიდი, ოზურგეთი, ამბროლაური, გორი, მცხეთა, ახალციხე და თელავი მომავალ თვითმმართველობის არჩევნებს თვითმმართველი ერთეულის სტატუსის გარეშე შეხვდება.
პრეზიდენტს შეუძლია ვეტო დაადოს ამ კანონპროექტს თუ გიორგი მარგველაშვილი სასწრაფოდ დაასახელებს თვითმმართველობის არჩევნების თარიღს -, კანონში ცვლილებების შეტანა ვეღარ მოესწრება და შვიდივე ქალაქი: ისევ თვითმმართველი სტატუსით მიიღებს არჩევნებში მონაწილეობას. სხვა შემთხვევაში ქართულ ოცნებას, რომელსაც არც ამჯერად გაუჭირდება ვეტოს დაძლევა, შეუძლია მოსახლეობის აზრზე გამარჯვება იზეიმოს, მით უფრო რომ ამ სტატუსზე უარი შვიდივე ქალაქის, მათ შორის ზუგდიდის საკრებულოს უმრავლესობის წევრებსაც ათქმევინა.
რუსთავი 2 – ის გუშინდელ გადაცემაში ,,პოსტ სკრიპტუმ'', ეთერი დაეთმო მოქალაქეებს, რომელთაც მორჩილი საკრებულოებისგან მკვეთრად განსხვავებული ბრძოლისუნარიანობა და პოზიცია აქვთ ამ საკითხზე.
ზუგდიდის მოსახლეობის დიდი ნაწილის მოსაზრებები რუსთავი 2 – ის ეთერში მაია კალანდიამ და კობა შონიამ გაახმოვანეს.
ისინი ფიქრობენ, რომ ამ რეფორმით მმართველი გუნდის მთავარი მიზანია თვითმმართველობის არჩევნების მოგება, რადგან მათი რეიტინგი ქალაქებში საგრძნობლად დაბალია, ვიდრე სოფლებში. ამით ის ცდილობს დათრგუნოს ხალხის წინააღმდეგობის უნარი, ბრძოლის უაზრობის, ამაოების შეგრძნება და აპათიისა და ყველაფერთან შეგუების განწყობა დათესოს ხალხში.
რაც შეეხება ეკონომიკური ხასიათის არგუმენტებს, ეს ცვლილება რეგიონებს ამ მხრივაც ბევრს არაფერს მოუტანს, სამაგიეროდ კი დამოუკიდებლობის ხარისხი კიდევ უფრო შემცირდება.