ერთიანმა ნაციონალურმა მოძრაობამ საზოგადოებას წარუდგინა ახალი ინიციატივა, რაც თბილისში მცხოვრები სოციალურად დაუცველი და 40 000 ლარამდე შემოსავლის მქონე ოჯახების ბავშვებისთვის სპორტული და სახელოვნებო ვაუჩერების გადაცემას ითვალისწინებს. ამ პროგრამით ისარგებლებენ ბავშვები მეექვსე კლასის ჩათვლით, ვაუჩერი მათ მისცემს საშუალებას იარონ სხვადასხვა წრეებზე.
როგორც პარტიის წარმომადგენლები აღნიშნავენ, ინიციატივა მათი წინასაარჩევნო პროგრამის ნაწილია.
„თბილისის ბიუჯეტის ზედაპირული შესწავლაც კი გვაძლევს იმის საშუალებას, რომ ვნახოთ ის რეზერვები, რომელიც სრულიად გამოუყენებელია დღევანდელი ხელისუფლების პირობებში. ერთიანი ნაციონალური მოძრაობა აპირებს 20 მილიონის გამოყენებას იმისთვის, რომ პირველიდან მეექვსე კლასამდე თბილისში მცხოვრები ბავშვები იმ ოჯახებიდან, რომელსაც 40 ათასზე ნაკლები შემოსავალი აქვთ, საშუალება ჰქონდეთ ვაუჩერი მიიტანონ იმ სპორტულ, სახელოვნებო ან მეცნიერულ წრეში, რომელიც უნდათ,“ – განაცხადა ერთიანი ნაციონალური მოძრაობის წარმომადგენელმა გრიგოლ ვაშაძემ.