საქართველოს ვიცე-პრემიერისა და რუსეთის პრემიერ-მინისტრის ერთობლივი ფოტო, კვლავ პოლიტიკური შეფასებების საგანია. ოპოზიციაში აცხადებენ, რომ ხელისუფლების წარმომადგენელთა მსგავსი ქმედებები რუსეთთან ურთიერთობების ე.წ. შერბილებას ემსახურება.„პრობლემის არსი არის არა სწორ ქცევაში, არამედ დამოკიდებულებაში ზოგადად რუსეთთან ურთიერთობაში, როდესაც ვცდილობთ, რომ მაქსიმალურად შევარბილოთ და ჩვენი აზრით არ გავამწვაოთ ურთიერთობა, როდესაც თავად ურთიერთობა ძალიან გამწვავებულია,“- ამბობს ევროპული საქართველოს წევრი ელენე ხოშტარია.დიმიტრი ქუმსიშვილის გადაწყვეტილებას გადაეღო სამახსოვრო ფოტო რუსეთის პრემიერ-მინისტრთან ერთად, "არასწორს" უწოდებენ ნაციონალურ მოძრაობაში.„ფინანსთა მინისტრს ელემენტარულად შეეძლო რომ უბრალოდ არ მიეღო იმ ფოტოსესიაში მონაწილეობა და ამით არაფერი დაშავდებოდა. უბრალოდ ისტორიაში ვერ მოხვდებოდა ამ „დიდ ადამიანებთან“ ერთად. სამაგიეროდ მოხვდებოდა სწორ ქცევაში,“-აცხადებს ენმ-ს წევრი რომან გოცირიძე.დიმიტრი ქუმსიშვილის განმარტება იზიარებს საპარლამენტო უმრავლესობა. მმართველი გუნდის წევრთა განცხადებით, ეს იყო პროტოკოლით გათვალისწინებული ფოტო და მას პოლიტიკური დატვირთვა არ უნდა მიეცეს.„ნაკლებად მგონია, რომ ის რაც არის პროტოკოლით და ოფიციალური სტანდარტით განსაზღვრული, ასეთი ფაქტების პოლიტიკურ ჭრილში გადატანა იყოს მიზანშეწონილი. მესმის ამ საკითხის მორალური მხარე და აბსოლუტურად გასაგებია ემოციური ნაწილი საკითხის, მაგრამ ეს იყო ოფიციალური პროტოკოლური ფოტო, როგორც განმარტა მინისტრმა,“-განაცხადა ეკა ბესელიამ.შეგახსენებთ, რომ ფოტოზე, რომელიც შავი ზღვის ეკონომიკური თანამშრომლობის ფორუმზეა გადაღებული, დიმიტრი ქუმსიშვილი რუსეთის მთავრობის მეთაურის დიმიტრი მედვედევის გვერდით დგას.
ფოტო მედვედევთან – ოპოზიცია ქუმსიშვილს ქცევას უწუნებს, მმართველი გუნდი კი მომხდარში აჟიოტაჟის მიზეზს ვერ ხედავს
Published on