ზუგდიდში მოქმედი არასამთავრობო ორგანიზაციები საკრებულოს დღევანდელ სხდომას და სხდომაზე მიღებულ გადაწყვეტილებას დღის ბოლოს ბრიფინგით გამოეხმაურნენ. მესამე სექტორის წარმომადგენლების განცხადებით, სხდომა, სადაც სამთავრობო ინიციატივა ქალაქ ზუგდიდისა და ზუგდიდის თემის გაერთიანების შესახებ მოიწონეს და მხარი დაუჭირეს, პროცედურული დარღვევებით წარიმართა. სამოქალაქო სექტორის წარმომადგენლების განცხადებით, არც მათ და არც რიგით მოქალაქეებს არ მიეცათ საკუთარი აზრის დაფიქსირების საშუალება მიუხედავად იმისა, რომ წინასწარ იყო შედგენილი სიტყვით გამომსვლელთა მსურველების სია.
არასამთავრობო ორგანიზაციების წარმომადგენლების განცხადებით, საკრებულოს თავმჯდომარეს სხდომის დახურვამდე უნდა დაეფიქსირებინა ისიც, თუ ვინ იყო წინააღმდეგი და ვინ მომხრე, რაც არ მომხდარა.
„საერთაშორისო გამჭვირვალობა – საქართველო“, „ახალგაზრდა იურისტთა ასოციაცია“, „საუნჯე“ და „სამართლიანი არჩევნები“ სხდომის ოქმის გაცნობის შემდეგ გადაწყვეტენ, გაასაჩივრებენ თუ არა დღეს მიღებულ გადაწყვეტილებას.