თბილისის მერი დავით ნარმანია ადასტურებს გავრცელებულ ინფორმაციას, რომ თვითმმართველობის არჩევნების შემდეგ აუდიტის სამსახურის უფროსის პოსტზე ერთ-ერთ კანდიდატურად განიხილება.
„ამ საკითხზე მმართველ გუნდში მსჯელობა მიმდინარეობს. განიხილება რამდენიმე ვერსია, მათ შორის განიხილება ეს ვერსიაც“, – განაცხადა ნარმანიამ ჟურნალისტების შესაბამისი შეკითხვის პასუხად. იგი ასევე, არ გამორიცხავს, რომ თბილსის მერის პოსტზე კენჭი კახი კალაძემ იყაროს.
მისივე განმარტებით, კონსულტაციები მიმდინარეობს თბილისის მერობის კანდიდატსა და ზოგადად თვითმმართველობის არჩევნებთან დაკავშირებული საკითხის შესახებაც.
„კონსულტაციები მიმდინარეობს რამდენიმე მნიშვნელოვან საკითხზე, მათ შორის არის არჩევნებთან დაკავშირებული საკითხი და როგორც კი დასრულდება, აუცილებლად გაიგებთ ამის შესახებ“, – აღნიშნა თბილისის მერმა.
როგორც ცნობილია, სახელმწიფო აუდიტის სამსახურის ხელმძღვანელის პოსტი 2012 წლიდან ლაშა თორდიას უკავია, მაგრამ მალე უფლებამოსილების ვადა ეწურება.