ოკუპირებული აფხაზეთის საგარეო საქმეთა სამინისტრო ეხმაურება აშშ-ის პრეზიდენტის დონალდ ტრამპის მიერ ხელმოწერილ საკანონმდებლო აქტს, რომლის თანახმად, ამერიკა არ გაუწევს ფინანსურ დახმარებას იმ ქვეყნებს, რომლებიც აფხაზეთისა და სამხრეთ ოსეთის დამოუკიდებლობას აღიარებენ.
„სამწუხაროა, რომ აშშ-ის ახალმა ადმინისტრაციამ აირჩია ჩიხური გზა და მხარი დაუჭირა საქართველოს აბსურდულ მოთხოვნებს და მისწრაფებას აფხაზეთის რესპუბლიკის ბლოკადისა და საერთაშორისო იზოლაციისაკენ. . აშშ-ის ლიდერები, რომლებიც თავს თავისუფლებისა და ადამიანის უფლებების დამცველებად წარმოაჩენენ, სინამდვილეში, დაუფარავად ატარებენ ორმაგი სტანდარტების პოლიტიკას, რითაც მათთვის არასასურველ სახელმწიფოებზე პოლიტიკურ და ფინანსურ ზეწოლას ახორციელებენ“, – ნათქვამია ოკუპირებული აფხაზეთის ე.წ. საგარეო საქმეთა სამინისტროს განცხადებაში.
„აშშ ადმინისტრაციამ უნდა გააცნობიეროს, რომ მხოლოდ აღიარება და სამხრეთ კავკასიაში შექმნილი პოლიტიკური რეალიების ადექვატური აღქმა არის გამოსავალი შექმნილი სიტუაციიდან. – აფხაზეთის საერთაშორისო იზოლაციის პოლიტიკა მხოლოდ ართულებს მხარეებს შორის დიალოგის მიღწევას და აბათილებს ჟენევის დისკუსიების მონაწილეებს შორის გადადგმულ ძალისხმევას“ – ნათქვამია განცხადებაში
ცნობისათვის: აფხაზეთის დამოუკიდებელი რესპუბლიკა აღიარებული აქვთ რუსეთის ფედერაციას, ვენესუელას, ნიკარაგუას, ნაურუს, აღიარებული ჰქონდათ ასევე ვანუატუსა და ტუვალუს, მაგრამ მოგვიანებით მათ ამ აღიარების ანულირება მოახდინეს.