დღეს ბიძინა ივანიშვილის რეზიდენციასთან ბავშვთა სამყაროში გაჩენილი ხანძრის შედეგად დაზარალებულმა მოვაჭრეებმა კიდევ ერთხელ მოითხოვეს გამოძიების დროულად ჩატარება. აქციის მონაწილეები ეჭვობენ, რომ შენობაში ხანძარი განზრახ გააჩინეს. ისინი ბავშვთა სამყაროს დირექტორის, შენობაში შემავალი კონტრაქტორი კომპანიების, ხელმძღვანელი პირების და დაცვის სამსახურის წინააღმდეგ სისხლის სამართლის საქმის აღძვრას მოითხოვენ.
დაზარალებულები აცხადებენ, რომ ბიძინა ივანიშვილი ქვეყნის არაფორმალური მმართველია და ამიტომ დახმარებას სწორედ მისგან ითხოვენ.
მათ დღეს ივანიშვილის სახლის წინ კარვის დადგმაც სცადეს, თუმცა პოლიციამ მათ ამის უფლება არ მისცა, ეასაც ხმაური და სამართალდამცავებთან შელაპარაკება მოყვა
ამ დროისათვის „ბავშვთა სამყაროში“ გაჩენილი ხანძრის შედეგად დაზარალებულთა საპროტესტო აქცია დასრულებულია.
აქციის ერთ-ერთი ორგანიზატორის ზაზა ხატიაშვილის ინფორმაციით, ისინი საპროტესტო აქციას ივანიშვილის ბიზნესცენტრთან ყოველდღე გამართავენ. ხვალ აქცია 12:00 საათზეა დაგეგმილი.