დღეს ეკონომიკისა და მდგრადი განვითარების მინისტრმა, დიმიტრი ქუმსიშვილმა ჟურნალისტებთან გამართულ საუბარში განაცხადა, რომ ანაკლიის პორტთან დაკავშირებით ტენდერში გამარჯვებული თვის ბოლოს ან მომდევნო თვის დასაწყისში გამოცხადდება.
მისი თქმით, ანაკლიის პორტთან დაკავშირებით ჩინეთში ვიზიტისას, საქართველოს პრემიერ-მინისტრ ირაკლი ღარიბაშვილთან შეხვედრაზე, ძალიან მნიშვნელოვანი მესიჯი მიიღეს ჩინეთის პრემიერ-მინისტრისგან.
"რამოდენიმე მნიშვნელოვანი საკითხი გააჟღერა ჩინეთის პრემიერმა. მათ შორის ერთ-ერთი იყო ანაკლიის პორტი. მან დააფიქსირა, რომ მისთვის ცნობილია და მხარს უჭერს ანაკლიაში აღნიშნული პროექტის განხორციელებას. ამ დონეზე ნათქვამ ყველა სიტყვას ძალიან დიდი მნიშვნელობა ენიჭება. აქედან გამომდინარე, ვფიქრობ, რომ ეს სახელმწიფო მხარდაჭერა, რომელიც ჩვენ მივიღეთ, აუცილებლად აისახება ცხოვრებაში",- განაცხადა ქუმსიშვილმა.