საქართველოს პრემიერმინისტრი ამერიკის შეერთებულ შტატებში იმყოფება. გიორგი კვირიკაშვილი ვაშინგტონში ვიცე პრეზიდენტის მიწვევით ჩავიდა.
გიორგი კვირიკაშვილი და მაიკ პენსი შეხვედრაზე საქართველო-ამერიკის სტრატეგიული თანამშრომლობის ქარტიის დღის წესრიგით განსაზღვრულ საკითხებს განიხილავენ. საქართველოს მთავრობის მეთაურს სახელმწიფო მდივანი, რექს ტილერსონიც უმასპინძლებს.
დაგეგმილია პრემიერმინისტრის შეხვედრები სენატის სხვადასხვა კომიტეტის თავმჯდომარეებთან და კომერციის მდივანთან.
„საუბარი იქნება ევროატლანტიკურ ინტეგრაციაზე, ჩვენი ქვეყნის ტერიტორიული მთლიანობის საკითხებზე. ძალიან მნიშვნელოვანი იყო ის მხარდაჭერა, რომელიც ჩვენ გვქონდა ბოლო პერიოდში ამერიკელი კონგრესმენების მხრიდან, თუნდაც ის წერილი, რომელიც რამდენიმე დღის წინ გამოქვეყნდა. 30-მა კონგრესმენმა მიმართა ამერიკის შეერთებული შტატების პრეზიდენტს. ეს ჩვენ გვაძლევს რწმენას, რომ ეს მხარდაჭერა არის შეუქცევადი და მომავალშიც გაგრძელდება,“ – განაცხადა საგარეო საქმეთა მინისტრის მოადგილემ დავით ზალკალიანმა.
საქართველოს პრემიერმინისტრი ვიზიტის ფარგლებში, აშშ-ის არასამთავრობო ორგანიზაციებისა და წამყვანი საექსპერტო წრეების წარმომადგენლებსაც შეხვდება.