„ევროპული საქართველოს“ ლიდერი დავით ბაქრაძე დღეს ზუგდიდში იმყოფებოდა. პარტიის სხვა ლიდერებთან – ლელა ქებურიასთან, ლაშა დამენიასთან და თენგიზ გუნავასთან ერთად ის დღეს ფაიფურის დასახლებაში მოსახლეობას შეხვდა და არჩევითი სისტემისა და კონსტიტუციის შესახებ ადგილობრივებისგან აზრი მოისმინა და საკონსტიტუციო ცვლილებაზე პლებისციტის ჩატარების აუცილებლობაზე ისაუბრა. დავით ბაქრაძის თქმით, მნიშვნელოვანია მოსახლეობასთან შეხვედრა და მათი გამოკითხვა. მისივე განცხადებით, უახლოეს დღეებში „ევროპული საქართველო“ ხელმოწერების შეგროვებას დაიწყებს პლებისციტის მოთხოვნით.
დღევანდელ შეხვედრაზე „ევროპული საქართველოს“ ლიდერმა ასევე საქართველოს ტერიტორიული მთლიანობის შსახებაც ისაუბრა, რომელსაც აშშ-ი მხარს აქტიურად უჭერს.
ფაიფურის შემდეგ დავით ბაქრაძე ზუგდიდში გაემგზავრა და ცენტრალური სუპერმარკეტის თანამშრომლებს შეხვდა. ის ადგილზე რამდენიმე მოვაჭრეს გაესაუბრა და თანაპარტიელებთან ერთად პარტიის ფლაერები დაარიგა.
„ევროპული საქართველოს“ წევრები აცხადებენ, რომ მსგავს შეხვედრებს სხვა რეგიონებშიც გააგრძელებენ.