ქალაქ ზუგდიდის საკრებულოს აპარატის უფროსი, გრიგოლ მიქავა, რომელიც წუხელ დააკავეს, ამ დროისთვის გათავისუფლებულია.
არსებული ცნობით, ზუგდიდის საკრებულოს აპარატის უფროსს ნარკოლოგიური შემოწმება არ ჩატარებია, ვინაიდან მან შარდის ჩაბარებაზე უარი განაცხადა. 12-საათიანი დაკავების შემდეგ ის გაათავისუფლეს.
სამართალდამცავებმა ზუგდიდის საკრებულოს აპარატის უფროსი წუხელ დააკავეს. არაოფიციალური ინფორმაციით, საქმე ნარკოტიკებს უკავშირდებოდა.
ამასთან, წუხელ ღამით სამართალდამცავებმა ზუგდიდში ადგილობრივი მკვიდრი ლევან ხვიტიაც დააკავეს, რომელსაც, მისივე ადვოკატის ინფორმაციით, საექსპერტო-კრიმინალისტიკურ დეპარტამენტში შემოწმებისას მარიხუანას მოხმარება დაუდგინდა.
მისი ადვოკატის მტკიცებით, ხვიტიას დაკავებას ზუგდიდის საკრებულოს აპარატის უფროსის გრიგოლ მიქავას დაკავებასთან კავშირი არ აქვს.
არსებული ინფორმაციით, წუხელ ასევე ქალაქ ზუგდიდის მაჟორიტარი-დეპუტატის, მერაბ ქვარაიას ძმა მამუკა ქვარაია დააკავეს. გავრცელებული ინფორმაციით, მისი დაკავება ასევე ნარკოტიკებს უკავშირდება.