ჩვენ უნდა შევცვალოთ არადემოკრატიული კონსტიტუცია დემოკრატიულით და ამაში ხელს ვერ შეგვიშლის ის არასწორი კამპანია, რომელიც საქართველოს პრეზიდენტის თაოსნობით, პოლიტიკურ პარტიებთან ერთად წარიმართება, – ამის შესახებ საქართველოს პარლამენტის თავმჯდომარემ ირაკლი კობახიძემ განაცხადა.
„ჩვენ ვართ პირნათელი საზოგადოების წინაშე, რადგან ჩვენ ვცვლით არადემოკრატიულ კონსტიტუციას დემოკრატიული კონსტიტუციით. ეს არის საერთო სურათი.
რაც შეეხება საქართველოს პრეზიდენტს, პოლიტიკურ პარტიებს და სხვა სუბიექტებს, მათ აქვთ ერთი, სუბიექტური პოლიტიკური ინტერესები და ეს კამპანია სუბიექტურ პოლიტიკურ ინტერესებს ემსახურება.მათ ინტერესში არ შედის, რომ არადემოკრატიული კონსტიტუციის შეცვლა დემოკრატიული კონსტიტუციით წარმოადგინონ როგორც ამ ხელისუფლების მიღწევა. ეს არის მათი სამწუხარო პოლიტიკური ინტერესი და სწორედ ამ პოლიტიკური ინტერესებით ხელმძღვანელობენ როგორც ოპოზიციური პოლიტიკური პარტიები, ასევე, რაც განსაკუთრებით შემაშფოთებელია, საქართველოს პრეზიდენტი. ეს არის მათი ნეგატიული დღის წესრიგი, ჩვენ გვაქვს ჩვენი პოზიტიური დღის წესრიგი. ჩვენ უნდა შევცვალოთ არადემოკრატიული კონსტიტუცია დემოკრატიულით და ამაში ხელს ვერ შეგვიშლის ის აბსოლუტურად არასწორი კამპანია, რომელიც სამწუხაროდ წარიმართება საქართველოს პრეზიდენტის თაოსნობით, პოლიტიკურ პარტიებთან ერთად. ჩვენ გვაქვს ღირებულებითი განსხვავება მათ შორის იმ პოლიტიკურ პარტიებთან, რომლებიც ჩვენს წინააღმდეგ გამოდიან ამ კუთხით. მათი ღირებულება იყო ის არადემოკრატიული კონსტიტუცია, რომელიც წინა ხელისუფლების პირობებში ჩამოყალიბდა“, – განაცხადა ირაკლი კობახიძემ.
მისივე თქმით, პარტიებს შორის ასეთი დაპირისპირება თავსებადია, თუმცა შემაშფოთებელია, რომ ამ ყველაფერს წარმართავს საქათველოს პრეზიდენტი, რომელიც ზეპარტიული ფიგურა უნდა იყოს.