„ჩრდილოეთ კორეა უპატივცემლოდ მოეპყრო ჩინეთის სურვილს და მის პრეზიდენტს, როდესაც რაკეტა გაუშვა, თუმცა წარუმატებლად. ეს ცუდია“ – ასე გამოეხმაურა აშშ-ის პრეზიდენტი დონალდ ტრამპი ჩრდილოეთ კორეის მიერ ბალისტიკური რაკეტის მორიგ გამოცდას „ტვიტერის“ პირად გვერდზე.
ჩრდილოეთ კორეამ ბალისტიკური რაკეტა გამოსცადა, რომელიც აშშ-ს, იაპონიისა და სამხრეთ კორეის სამხედროების ინფორმაციით, წარუმატებელი აღმოჩნდა. ზუსტი მონაცემები რაკეტის გამოცდაზე ჯერ არ არის, თუმცა, იაპონიის მინისტრთა კაბინეტის გენერალური მდივნის ესიხიდე სუგის თქმით, ბალისტიკური რაკეტის გაშვება ფუკჩხანის რაიონიდან მოხდა, დაახლოებით 50 კმ მანძილი დაფარა და ჩრდილოეთ კორეის ტერიტორიაზე ჩამოვარდა.
ბალისტიკური რაკეტის გამოცდა გაერო-ს უშიშროების საბჭოს სპეციალური სხდომის შემდეგ რამდენიმე საათში მოხდა. უშიშროების საბჭოს სხდომაზე აშშ-ს, დიდი ბრიტანეთისა და იპაონიის საგარეო საქმეთა მინისტრებმა მკაცრად გააკრიტიკეს ჩრდილოეთ კორეა ბირთვულ პროგრამასთან დაკავშირებით.
აშშ-ს და კანადის აეროკოსმოსური თავდაცვის გაერთიანებული სარდლობის მონაცემებით, რაკეტის გაშვება ჩრდილოეთ ამერიკისთვის საფრთხეს არ წარმოადგენდა.