თურქეთში გუშინ ჩატარებული ანტიტერორისტული ოპერაციის ფარგლებში დაკავებულია კიდევ 412 ადამიანი, რომლებიც ეჭვმიტანილი არიან ტერორისტული ორგანიზაცია „ქურთისტანის მუშათა პარტიის“ საქმიანობაში. – იუწყება სააგენტო „ანადოლუ“
თურქეთის შინაგან საქმეთა სამინისტროს განცხადებით, ანტიტერორისტული ოპერაცია თურქეთის 21 პროვინციაში ჩატარდა. რეიდის შედეგად კონკრეტულ მისამართებზე, სადაც დაკავებულები ცხოვრობდნენ, დიდი რაოდენობით იარაღი, საბრძოლო მასალა და დოკუმენტაციაა ამოღებული.
გუშინდლამდე, ბოლო ერთი კვირის განმავლობაში თურქეთში „ისლამური სახელმწიფოს“ 131 ტერორისტი დააკავეს.
ამასობაში თურქეთის პრეზიდენტი, რეჯეფ თაიფ ერდოღანი მთავრობისგან სიკვდილით დასჯის აღდგენის თაობაზე კანონპროექტის წარდგენას ითხოვს – იუწყება გამოცემა Hurriyet.
„16 აპრილის შემდეგ, ღმერთის ნებით, კანონპროექტი სიკვდილით დასჯის აღდგენის თაობაზე წარდგენილ უნდა იქნას. თუ პარლამენტი მიიღებს ამ კანონპროექტს, მე მას დავამტკიცებ“, – განაცხადა რეჯეფ თაიფ ერდოღანმა ერზურუმის პროვინციაში გამართულ მიტინგზე სიტყვით გამოსვლისას. – „სიკვდილით დასჯის აღდგენისთვის საჭიროა საკონსტიტუციო ცვლილება, მაგრამ თუ პარლამენტი მას არ დაამტკიცებს, მე საზოგადოებას მივმართავ და ამ საკითხს რეფერენდუმზე გავიტან. დაე, საზოგადოებამ გადაწყვიტოს“, – დასძინა ერდოღანმა.
აღსანიშნავია, რომ თურქეთმა სიკვდილით დასჯა 2004 წელს ევროკავშირში გაწევრიანების თაობაზე მოლაპარაკებების პროცესის ფარგლებში გააუქმა.
საჯარო განხილვები სიკვდილით დასჯის აღდგენაზე 2016 წლის 15 ივლისის სახელმწიფო გადატრიალების მცდელობის შემდეგ დაიწყო. ერდოღანმა არა ერთხელ განაცხადა, რომ თუ ხალხის ნებაა, რომ სიკვდილით დასჯა აღდგეს, ის ამ ნებას აღასრულებს.