დღეს, 12 აპრილს ოკუპირებულ სოხუმში აფხაზეთის ახლადარჩეული ე.წ. პარლამენტის პირველი სხდომა გაიმართა. დღის წესრიგში იდგა სპიკერისა და ვიცესპიკერების არჩევა.
მოლოდინების საწინააღმდეგოდ, აფხაზური ოპოზიციის უპირობო ლიდერის ალექსანდრე ანქვაბის კანდიდატურა არცერთ ამ პოსტზე არ წარუდგენიათ, მან საპარლამენტო საქმიანობის გაგრძელება რიგითი დეპუტატის მანდატით არჩია, თუმცა, როგორც აფხაზური მედია წერს, ეს არჩევანი მხოლოდ პირადი სურვილით არ ყოფილა განპირობებული – ანქვაბმა, როგორ პრეზიდენტ ხაჯიმბასთვის მიუღებელმა კანდიდატმა, თავი აარიდა ვითარების დაძაბვას და დესტრუქციის შეტანას ახალ პარლამენტში, რაც აუცილებლად მოყვებოდა ხაჯიმბას მომხრეების წინააღმდეგობას მისი კანდიდატურის ჩასაგდებად და, მით უფრო, გასვლის შემთხვევაში. როგორც ჩანს, ანქვაბს არ სურს მისცეს საშუალება მმართველ პარტიას აფხაზეთში საზოგადობრივ- პოლიტიკური და ეკონომიკური მდგომარეობის გარდუვალი მარცხი შემდგომ პერიოდში გაამართლოს მისი წინააღმდეგობით და მით უფრო გადაინაწილოს პასუხისმგებლობა ამ მარცხისთვის პარლამენტის ხელმძღვანელი პირის რანგში.
პარლამენტის სპიკერის პოსტზე დღეს წარდგენილი იყო ვალერი კვარჭიასა და ბათალ ტაბაღუას კანდიდატურები, მესამე კანდიდატმა – დეპუტატმა ილია გაბუნიამ კენჭისყრამდე თავის თავს აცილება მისცა.
ფარული კენჭისყრით ხმების უმრავლესობა (20 ხმა) მიიღო ვალერი კვარჭიამ, ბათალ ტაბაღუამ მხოლოდ ათი ხმა, ოთხმა დეპუტატმა ხმა მისცა ,,ყველას წინააღმდეგ''.
სამი ვიცესპიკერის თანამდებობაზე წარდგენილი იყო ოთხი კანდიდატურა – საიდ ხარაზია, ლევონ გალუსტიანი, მიხეილ ჩამაგუა და ნატალია სმირი. ნატალია სმირმა, რომელიც ერთადერთი დეპუტატი ქალია აფხაზეთის პარლამენტში, თავის კანდიდატურას აცილება მისცა, შედეგად, ვიცესპიკერატი ,,გრიალ – გრიალით'' დაკომპლექტდა დარჩენილი სამი კანდიდატურიდან.