მოახლოებულ დღესასწაულებთან დაკავშირებით ისრაელის სახელმწიფოში საზღვრის კვეთის პროცედურები  მკაცრდება – ითქვა საქართველოში ისრაელის ელჩისა და  საქართველოს საგარეო საქმეთა სამინისტროს საკონსულო დეპარტამენტის დირექტორის  ერთობლივ პრესკონფერენციაზე, რიომელიც დღეს გაიმართა.

 

ისინი, ვინც წმინდა მიწაზე  სააღდგომო მოლოცვისთვის გამგზავრებას გეგმავს, საზღვარზე   კიდევ უფრო გამკაცრებულ და ხანგრძლივ  შემოწმებას გაივლიან, ამიტომ საქართველოს მოქალაქეებმა უნდა გაითვალისწინონ ეს გარემოებები და მაქსიმალურად ზედმიწევნით დაიცვან ყველა მოთხოვნა, რომელიც  საზღვრის კვეთასთან, მგზავრობის მიზნობრიობასთან, ფინანსური უზრუნველყოფასთან არის დაკავშირებული. – განაცხადა  საკონსულო დეპარტამენტის დირექტორმა გიორგი ტაბატაძემ –  კერძოდ, მოთხოვნის შემთხვევაში, მზად უნდა იყონ წარადგინონ იმის  დამადასტურებელი დოკუმენტები,  თუ სად იცხოვრებენ, რა აქვთ გამიზნული, რამდენი ხანი უნდა დარჩნენ ქვეყანაში და აქვთ თუ არა უკან დასაბრუნებელი ბილეთები.

 

მისივე თქმით, ქვეყანაში შესვლის შემდეგაც მომლოცველები უნდა დაემორჩილონ ყველა იმ მოთხოვნას, რომელიც შესაძლოა, წაუყენონ სამართალდამცველებმა და იმ სასულიერო პირებმა, რომლებიც ტაძარში წესრიგს იცავენ.

“წერილობითი ინფორმაცია გავრცელდება ჩვენი სამინისტროს ვებგვერდზე. ჩვენი მოქალაქეები უნდა დაემორჩილონ ყველა იმ მოთხოვნას, რომელიც შესაძლოა მათ მიმართ იქნას წაყენებული, როგორც სამართალდამცველი ორგანოების მხრიდან, ასევე იმ სასულიერო პირებისგან, ვინც ემსახურება ტაძარში წესრიგის დამყარებას. ნებისმიერი შეპასუხება თუ უკმაყოფილება შესაძლოა აღიქვან გარკვეულ დარღვევად და ამას მოჰყვეს მყისიერი, ადეკვატური რეაქცია. ზომები გამკაცრებულია, ჩასულია უამრავი სტუმარი და ყოველგვარი დაუმორჩილებლობა ან უკმაყოფილება, შესაძლოა გახდეს იმის მიზეზი, რომ მოქალაქეს მოუხდეს ტაძრის დატოვება, ან იმ ტერიტორიის დატოვება, სადაც იგი იმყოფება. თუკი ჩვენი მოქალაქე დაიკარგება, მან უნდა მიმართოს პოლიციას ან საელჩო საკონსულო სამსახურს. მნიშვნელოვანია, მოქალაქეებმა გაითვალისწინონ, რომ მოერიდონ ე.წ. ტაძარში შესასვლელი სამაჯურების – ე.წ. ,,ბრასლეტების'' შეძენას, რადფან ხშირია მათი გაყალბების შემთხვევები – განაცხადა ტაბატაძემ.