თბილისის საქალაქო სასამართლომ აღკვეთის ღონისძიების სახით პატიმრობა შეუფარდა დიდი ოდენობით ქრთამის აღების და ამ საქმეში დახმარების ფაქტზე დაკავებულ ორ პირს – ზუგდიდის მუნიციპალიტეტის გამგეობის წარმომადგენელს სოფელ ზედაეწერში სევერიანე ბერულავას და მოქალაქე ბადრი შ. -ს. გამოძიების ინფორმაციით, ზუგდიდის მუნიციპალიტეტის გამგეობის თანამშრომლებმა ამავე მუნიციპალიტეტის სოფელ ზედა ეწერში ყოფილი ამბულატორიის შენობის აუქციონზე გატანასა და გამარჯვებაში დახმარების სანაცვლოდ ერთი მოქალაქის შუამავლობით, მოქალაქეს ქრთამის სახით 15 ათასი ლარი მოსთხოვა.
"მოთხოვნილი თანხის ნაწილი – 5 ათასი ლარი მათ მოქალაქეს წინასწარ გამოართვეს, რა დროსაც ისინი ანტიკორუფციული სააგენტოს თანამშრომლებმა ბრალდებულის სახით დააკავეს. გადაცემული თანხა 5ათასი ლარი ამოღებულია ნივთმტკიცებად," – აცხადებენ სუს-ში.
უწყებაში გამოძიება საქართველოს სისხლის სამართლის კოდექსის 338-ე მუხლის მე-2 ნაწილის "ბ" ქვეპუნქტით მიმდინარეობს, რომელიც ქრთამის აღების და ქრთამის აღებაში დახმარებას გულისხმობს.
საქართველოს კანონმდებლობით, დიდი ოდენობით ქრთამის აღება ისჯება თავისუფლების აღკვეთით ვადით შვიდიდან თერთმეტ წლამდე.