აშშ-ის სენატის დაზვერვის კომიტეტი ამერიკის არჩევნებში რუსეთის შესაძლო ჩარევის საქმეს იძიებს. საგამოძიებო ჯგუფის სპეციალისტები უკვე ეცნობიან დაზვერვის სამსახურებისგან გამოთხოვილ ათასობით დოკუმენტს, რომლებიც ამერიკის 2016 წლის საპრეზიდენტო არჩევნებში რუსეთის შესაძლო ჩარევის საქმეს უკავშირდება.
ამ თემაზე მოკვლევას რესპუბლიკელები და დემოკრატები კონგრესის ორივე პალატაში აწარმოებენ. სენატის დაზვერვის კომიტეტის საგამოძიებო ჯგუფის თანამშრომლებს დაგეგმილი აქვთ 20 ადამიანის გამოკითხვა. მათ შორის იქნება დონალდ ტრამპის სიძე, ჯერედ კუშნერი.
“ეს არის ერთ-ერთი ყველაზე მასშტაბური გამოძიება, რომელიც კონგრესს ახსოვს,” – აცხადებს სენატის დაზვერვის კომიტეტის თავმჯდომარე რიჩარდ ბური.
სენატის დაზვერვის კომიტეტის გამოძიებაში 7 სპეციალისტია ჩართული. ისინი ფლობენ ე.წ. “უსაფრთხოების მანდატებს”, რათა დაზვერვის მასალებზე თავისუფალი წვდომა ჰქონდეთ.
„ვიდრე ჩვენ ვსაუბრობთ, რუსეთი ქმედებებს აგრძელებს. ზოგიერთი ჩვენი ახლო მოკავშირე ევროპაში განიცდის ზუსტად ასეთივე ჩარევას, საკუთარ პოლიტიკურ პროცესებში. გერმანიამ განაცხადა, რომ მათი პარლამენტი დაჰაკულია. საფრანგეთის პრეზიდენტობის კანდიდატზე რუსეთის დეზინფორმაცია და პროპაგანდა ვრცელდება. ჰოლანდიელებმა ხელით დათვალეს ბიულეტენები, რადგან მათ საარჩევნო პროცესში რუსეთის ჩარევის ეშინოდათ,“- განაცხადა სენატის დაზვერვის კომიტეტის თანათავმჯდომარე მარკ უორნერიმ.
დღესვე ცნობილი გახდა, რომ ჰილარი კლინტონი ერთადერთი კანდიდატი არ ყოფილა, რომელიც რუსული კიბერთავდასხმების ობიექტი გახდა. რუსებს შეტევის მცდელობა მარკო რუბიოს კამპანიის წევრებზეც ჰქონდათ.
ამერიკულ არჩევნებში რუსეთის ჩარევის და ტრამპის კამპანიის რუსეთთან შესაძლო კავშირებზე გამოძიება კონგრესის ორივე პალატის გარდა, გამოძიების ფედერალურ ბიუროშიც მიმდინარეობს, რაც წინა კვირას FBI-ის ხელმძღვანელმა დაადასტურა.