ეგვიპტის სასამართლომ ჰოსნი მუბარაქი პატიმრობიდან გაათავისუფლა. პროკურატურამ ყოფილი პრეზიდენტის დაცვის მხარის მოთხოვნას დაუჭირა მხარი და დაკავების დღიდან პატიმრობაში გატარებული პერიოდი სასჯელის ვადაში ჩაუთვალა.
2011 წლის რევოლუციის შემდეგ ჰოსნი მუბარაქის წინააღმდეგ პროკურატურამ სისხლის სამართლის რამდენიმე საქმე აღძრა, თუმცა ერთი კვირის წინ კაიროს საკასაციო სასამართლომ ექსპრეზიდენტი გაამართლა დემონსტრანტების მკვლელობის ნაწილში და რევოლუციის დროს დემონსტრანტების მკვლელობის შესახებ ბრძანების გაცემის ბრალდება მოუხსნა.
რაკი იგი გამართლდა იმ მუხლში, რომლითაც 2011 წლის იანვარში 239 მომიტინგის მკვლელობის გამო სამუდამო პატიმრობა ჰქონდა მისჯილი, ხოლო სამწლიანი პატიმრობა, რომლიც სახელმწიფო სახსრების მითვისების ბრალდებით განესაზღვრა, მან უკვე მოიხადა, მუბარაქი თავისუფალია.
ადვოკატის განცხადებით, 88 წლის მუბარაქი ამ დროისთვის სამხედრო ჰოსპიტალში იმყოფება და მკურნალობის დასრულების შემდეგ სახლში დაბრუნდება.