საქართველოში კორონავირუსით მე-16 პაციენტი გარდაიცვალა. ამის შესახებ ინფორმაცია ცოტა ხნის წინ Stopcov.ge-ზე განახლდა. დაავადებათა კონტროლის ცენტრის ხელმძღვანელის, ამირან გამყრელიძის თქმით, გარდაცვლილი 70 წელს გადაშორებული კაცია.

“ახალი პაციენტებიდან, ამ 2-3 დღის განმავლობაში, ერთერთის მდგომარეობა მძიმეა”. – ამის შესახებ თბილისის ინფექციური საავადმყოფოს სამედიცინო დირექტორმა, მარინა ეზუგბაიამ დღეს დილით ჟურნალისტებთან საუბრისას თქვა. მისივე განმარტებით, დაწყებული მკურნალობის ფონზე, მძიმე პაციენტის მდომარეობა სტაბილურდება და პროგრესირება აღარ შეინიშნება.

დღეს, 20 ივლისს, საქართველოში ახალი კორონავირუსით ინფიცირების 11 ახალი შემთხვევა დადასტურდა, მათგან 5 ახალი პაციენტი ინფექციურ საავადმყოფოში მოათავსეს. “ამ 5 დადასტურებული შემთხვევიდან 1 გახლავთ შემოტანილი, ეს არის საკარანტინო სივრციდან რუსეთიდან ჩამოსული მოქალაქე, რომელსაც კარანტინში დაუდასტურდა დიაგნოზი და გადმოიყვანეს ჩვენთან. დანარჩენი 4 შემთხვევა გახლავთ დადასტურებულ შემთხვევებთან კონტაქტები”. – ამბობს ეზუგბაია.

სულ მარინა ეზუგბაიას ცნობით, კოვიდცენტრებში, დღევანდელი მონაცემებით, 162 პაციენტი მკურნალობს. უცხოეთიდან საქართველოში სამკურნალოდ 41 ადამიანია გადმოყვანილი.

ბოლო მონაცემებით, ქვეყანაში კორონავირუსის სულ 1039 შემთხვევაა გამოვლენილი, აქედან 900 ადამიანი უკვე გამოჯანმრთელდა, ხოლო 16 გარდაიცვალა. კარანტინის რეჟიმში რჩება 5 534 პირი, სტაციონარში მეთვალყურეობის ქვეშ — 267.