მესტიის მუნიციპალიტეტის სოფელ მულახში დაკარგული მამაკაცის 50 წლის ო. კ.-ს ცხედარი მეხანძრე-მაშველებმა ხუთდღიანი ძებნის შემდეგ მდინარე მულხურაში იპოვეს. ავტომანქანა მესტია-უშგულის გზაზე 12 ივლისს გადავარდა ხევში. შემთხვევა დღის მეორე ნახევარში მოხდა. მაშველებმა ადგილობრივების დახმარებით „დელიკას“ მარკის ავტომობილი წყლიდან ამოიყვანეს, თუმცა იქ არავინ აღმოჩნდა. ადგილობრივების თქმით, სავარაუდოდ, მამაკაცი წყალმა გაიტაცა, რადგან ავტომობილის ორივე კარი ღია იყო.

ადგილობრივების ცნობით, დაკარგული მამაკაცი სოფელ კალადან მესტიის მიმართულებით მიდიოდა და ავტომანქანაში მარტო იმყოფებოდა. ის ბეჩოს თემში ცხოვრობს. 

“5 დღის განმავლობაში უწყვეტ რეჟიმში მიმდინარეობდა საძიებო-სამაშველო ოპერაცია. პროცესში ჩართული იყო საგანგებო სიტუაციების მართვის სამსახურის სახანძრო-სამაშველო ძალების დეპარტამენტის 40-მდე თანამშრომელი. მათ შორის განსაკუთრებულ სიტუაციებზე რეაგირების მესტიის სამაშველო ჯგუფი. წყლის ფსკერის დათვალიერება მიმდინარეობდა ექოლოტის საშუალებით. შექმნილი იყო სამუშაო შტაბი, საიდანაც ხორციელდებოდა საძიებო ოპერაციის მონიტორინგი” – აცხადებს საგანგებო სიტუაციების მართვის სამსახური.