დღეს განათლებისა და მეცნიერების განვითარების სტრატეგიული გეგმის წარდგენაზე განათლების მინისტრმა ალექსანდრე ჯეჯელავამ განაცხადა, რომ 2017 წლიდან სტუდენტთა დაფინანსების წესი შეიცვლება.
კერძოდ, მისი თქმით, აკადემიური მოსწრება ყოველწლიურად დაფინანსების მოპოვებისათვის გადამწყვეტი უნდა იყოს და აბიტურიენტი მხოლოდ ეროვნული გამოცდების შედეგებით ოთხწლიან გრანტს არ უნდა იღებდეს უნდა შეიქნას ახალი სისტემა, რომელიც ქვეყნის ეკონომიკურ საჭიროებებზე უნდა იყოს მორგებული.
„შევეცდებით, ახალგაზრდები იმ პროფესიაში, იმ მიმართულებით დავაფინანსოთ, სადაც ყველაზე მეტად გვჭირდებიან. აკადემიური მოსწრება ყოველწლიურად დაფინანსების მოპოვებისათვის გადამწყვეტი უნდა იყოს. ეს კომპონენტი დღევანდელ სისტემაში გათვალისწინებული არ არის. მოგეხსენებათ, დღეს ერთხელ თუ მიიღო სტუდენტმა გრანტი, ის მას ბოლომდე მიყვება მიუხედავად აკადემიური შედეგებისა“,– განაცხადა ჯეჯელავამ და დასძინა, რომ აღნიშნული სწორ მიმართულებებს არ წაახალისებს.
სტუდენტთა დაფინანსების წესის ცვლილებას პარლამენტში მიესალმებიან. განათლებისა და მეცნიერების საპარლამენტო კომიტეტის თავმჯდომარე მარიამ ჯაში აცხადებს, რომ არსებული მოდელი ახალგაზრდებში სწავლის სტიმულის გაღვივებას ხელს არ უწყობს. მისი აზრით, გრანტის გაგრძელების ვადაცა და ოდენობაც ყოველწლიურად, სტუდენტის დამსახურების მიხედვით უნდა განისაზღვრებოდეს.
“მინისტრის პოზიციას ვეთანხმები, რადგან დღევანდელი სისტემა სწავლის პროცესში აკადემიური მოსწრებისათვის მოტივაციის ხელშემწყობი არ არის. როდესაც აბიტურიენტი 4 წლის ვადით დაფინანსების გარანტიას იღებს იმის მიუხედავად თუ რა შედეგებს აჩვენებს წლიდან წლამდე, რა თქმა უნდა, მოტივაციისათვის ნეგატიურია.
„კურსიდან კურსზე გადასვლისას კონკრეტული ზღვრები უნდა დაწესდეს, რომელიც სტუდენტს საშუალებას მისცემს არსებული დაფინანსება შეინარჩუნოს. სასწავლო გრანტის გაგრძელებაცა და თანადაფინანსების პროცენტიც ბაკალვრიატის დონეზე შეფასებებთან გარკვეულ კორელაციაში უნდა იყოს. ესაა პრაქტიკა, რომელიც ყველა წარმატებული ქვეყნის წარმატებულ უნივერსიტეტშია დანერგილი,“ – განაცხადა მარიამ ჯაშმა