ირანში უკრაინის საელჩომ, რომელმაც ცოტა ხნის წინ ინფორმაცია გაავრცელა, რომ ბოინგ-737-ის ტიპის თვითმფრინავმა კატასტროფა ტექნიკური მიზეზების გამო განიცადა, განცხადება წაშალა და დააზუსტა, რომ ინფორმაცია დადასტურებული არ ყოფილა. მათი ცნობით, მიმდინარეობს ტრაგედიის მიზეზების დადგენა.
„კომისიის მიერ მიმდინარეობს კატასტროფის მიზეზების დადგენა. ნებისმიერი განცხადება, რომელიც კომისიის გადაწყვეტილებამდე იქნა გავრცელებული, არ არის დადასტურებული“,-წერია საელჩოს მიერ გამოქვეყნებულ განცხადებაში.
ამასთან, უკრაინის საერთაშორისო ავიახაზებმა დაადასტურა ინფორმაცია, რომ ხომალდი, რომელიც თეირანი-კიევის ფრენას ახორციელებდა, აგებული იყო 2016 წელს. მათივე ცნობით, მგზავრების ზუსტი ციფრი, ამ დრომდე დადგენილი არ არის.
განცხადებას ავრცელებს უკრაინის საგარეო საქმეთა სამინისტროც. მათი ცნობით, ამ ეტაპზე არსებული ინფორმაციით, გამოირიცხება, რომ თვითმფრინავზე ტერორისტული შეტევა ან სარაკეტო თავდასხმა განხორციელდა.
შეგახსენებთ, რომ ირანში უკრაინის საერთაშორისო ავიახაზების კუთვნილმა ბოინგ-737-ის ტიპის თვითმფრინავმა კატასტროფა განიცადა. ყველა – 180-მდე ადამიანი, რომელიც ბორტზე იმყოფებოდა, დაიღუპა.