დღეს 15.00 საათზე სამაუწყებლო კომპანია რუსთავი 2-ში საგანგებო ბრიფინგი გაიმართება – ნიკა გვარამია კომპანიის საქმესთან დაკავშირებით, უზენაეს სასამართლოში მიმდინარე პროცესის თაობაზე განცხადებას გააკეთებს.
არსებობს საფუძვლიანი ეჭვი, რომ ხელისუფლება შეეცდება ამ დღეებში მოაგვაროს რუსთავის 2-ის საკითხი და დიდ პალატას მისთვის სასარგებლო გადაწყვეტილება მიაღებინოს. ამის შესახებ ღიად ლაპარაკობენ მედიაექსპერტები.
მედიაექსპერტების აზრით, უზენაეს სასამართლოს კოლეგიას საქმე ქვედა ინსტანციაში უნდა დაებრუნებინა, თუმცა ეჭვს აჩენს ის ფაქტი, რომ ეს არ მოხდა და არც ზეპირი მოსმენა გაიმართა.მათი შეფასებით, რუსთავი 2-ის სარედაქციო პოლიტიკის შეცვლა მთლიანად მედია გარემოს შეცვლის ქვეყანაში.
„ფაქტია, რომ მოსამართლეებზე ახდენენ ზეწოლას. მე არ ვიცი და თავს შევიკავებ კონკრეტული გვარების დასახელებისგან, მაგრამ მათი საერთო სახელი არის ბიძინა ივანიშვილი და ქართული ოცნება, რომელსაც ჯერ კიდევ ყელში ჰყავს გაჩხერილი რუსთავი 2. ყველაფერს გააკეთებენ და შეეცდებიან, რომ რაც შეიძლება სწრაფად მოიცილონ თავიდან რუსთავი 2. მგონია, რომ ისინი 2016 წელს ამ პრობლემისგან რაღაცნაირად გათავისუფლდებიან,“ – აცხადებს ნინია კაკაბაძე.
მედიის განვითარების ფონდის გამგეობის თავმჯდომარის თამარ კინწურაშვილის თქმით, .„რუსთავი 2-ის სარედაქციო პოლიტიკის შეცვლა, შეცვლის მთლიან მედიაგარემოს ქვეყანაში და ამ თვალსაზრისით არის სახიფათო.“