გვაქვს ინფორმაცია, რომ ფოთში პედაგოგებს აიძულებენ, 14 დეკემბერს კონტრაქციის დასასწრებად წავიდნენ, – ამის შესახებ „ნაციონალური მოძრაობის” ფოთის საქალაქო ორგანიზაციის თავმჯდომარე დარეჯან ცხვიტარიამ დღეს გამართულ ბრიფინგზე განაცხადა.
მისი თქმით, ეს „ქართული ოცნების” დირექტივით ხდება. იგი უფასო იურიდიულ დახმარებას სთავაზობს ყველა იმ პირს, რომელსაც, როგორც თავად ამბობს, პოლიტიკურ პროცესებში მონაწილეობას აიძულებენ.
„ხელისუფლება ახალგაზრდების საწინააღმდეგოდ აგროვებს ხალხს. ჩვენ გვაქვს ინფორმაცია, რომ ფოთიდან ძალდატანებით უნდათ პედაგოგების წაყვანა. საჯარო მოხელეებსაც კი არ უნდათ იქ წასვლა. სისხლით მოპოვებული პროპორციული არჩევნების დათმობა, ნამდვილად არ უნდა ახალგაზრდებს და არც დათმობენ. ჩვენც მათ გვერდით ვდგავართ და ვიბრძოლებთ ბოლომდე. ქართველი ხალხი ამ გადაგდებას არ აპატიებს ბიძინა ივანიშვილს. ჩვენი ქალაქიდან ნებაყოფლობით არავის არ უნდა წასვლა, მაგრამ აძალებენ“, – განაცხადა დარეჯან ცხვიტარიამ.
ბრიფინგის შემდეგ ცხვიტარია ფოთის საგანმანათლებლო რესურს ცენტრში მივიდა და ხელმძღვანელს აღნიშნული პროცესისაგან გამიჯვნა სთხოვა. რესურსცენტრის ხელმძღვანელმა გოჩა ქორქიამ აღნიშნული ბრალდება უარყო და განაცხადა, რომ ყველა პედაგოგი თავის გადაწყვეტილებაში თავისუფალია.