“პოლიცია მოქმედებს კანონის ფარგლებში, არავინ არ არის დაკავებული. ეტყობა, ჩვენი ოპონენტებისგან არის მცდელობა, რომ პოლიტიკურ დანაშაულში გვამხილონ, თუმცა დაკავება კი არა, განრიდება მოხდა ერთ-ერთი ოპოზიციური ლიდერის და ასეც მოხდება, იმიტომ, რომ მათ არ გამოუვათ, დესტრუქცია შემოიტანონ პროცესებში.
ყველაფერი კანონის ფარგლებში მიმდინარეობს. ყველასათვის ნათელია, არაერთხელ მითქვამს, რომ ჩემთვის ეს ძალა ერთი ძალაა- ნაციონალური მოძრაობა. მათი ქმედებები ჩემთვის ადვილად გამოსაცნობია. სხვა გზა, გარდა დესტრუქციისა, მათ არ დარჩენიათ. ეს მდგომარეობა, რაც ჩვენი ქალაქის ქუჩებში ხდება, არავის არ მოსწონს.
პოლიტიკურ ძალას თუ რაღაც პრეტენზია აქვს, მათ ანალიზი უნდა გააკეთონ და ისე შეხედონ მოვლენებს. ერთადერთი, რაც მათ უნდოდათ, რომ საზოგადოება ჩაერთოთ თავიანთ პროტესტში, არ გამოუვიდათ. ჩვენი საზოგადოება საკმაოდ გათვიცნობიერებულია ამ საკითხებში. კარგი იქნება, თუ დაუბრუნდებიან კონსტრუქციულ რეჟიმს. ” – ასეთ კომენტარს აკეთებს ქართული ოცნების დეპუტატი მიხეილ ყაველაშვილი.
შეგახსენებთ, დღეს პარლამენტის წინ მიმდინარე აქციაზე ევროპული საქართველოს წევრები გიგი უგულავა და დეპუტატი გიორგი კანდელაკი დააკავეს. როგორც მათ გზაში უთხრეს, უბრალოდ განარიდეს.