მუშტი-კრივი, ლანძღვა-გინება არ არის ის მეთოდები, რითიც პარლამენტარები უნდა გამოხატავდნენ საკუთარ მოსაზრებებს სხდომათა დარბაზში, – ასე გამოეხმაურა „ნაციონალური მოძრაობის“ დეპუტატი თინათინ ბოკუჩავა პლენარული სხდომის მიმდინარეობისას დეპუტატებს შორის მომხდარ არაერთ სიტყვიერ დაპირისპირებას.
მან პარლამენტის თავმჯდომარეს საკითხის მოგვარება და ამ კონტექსტში დეპუტატ დაჩი ბერაიას დარბაზიდან გაყვანა სთხოვა.
„ჩემი ძლიერი მხარე მუშტი-კრივი არ არის და მინდა, რომ მშვიდ, ნორმალურ გარემოში წარმოვთქვა ჩემი აზრი და ასევე გადმოგცეთ მოსახლეობის აზრი, რადგან ერთი ადამიანი, რომელიც ყველა გამომსვლელის მიმართ გამოხატავდა აგრესიას, იქნება ეს ოპოზიციის წარმომადგენელი თუ დამოუკიდებელი დეპტუტატი, ეს არის დაჩი ბერაია. თუ ეს ადამიანია პრობლემა, გაიყვანეთ და გაანეიტრალეთ სიტუაცია“ , – აღნიშნა ბოკუჩავამ.
დეპუტატების დაპირისპირება წყალტუბოს განვითარების პროექტსა და საპატრიარქოს ირგვლივ განვითრებულ მოვლენებს მოყვა.