პრემიერმინისტრის მიერ მთავრობის სტრუქტურაში დაანონსებულ ცვლილებებს და სამინისტროების ოპტიმიზაციას საპარლამენტო ოპოზიცია ეხმაურება.
მათი თქმით, ოპტიმიზაციას მნიშვნელობა აქვს მხოლოდ იმ შემთხვევაში, თუ ბიუროკრატიული ხარჯები შემცირდება.
„სამინისტროები შეიძლება გააერთიანო, მაგრამ ბიუროკრატია კიდევ უფრო გაზარდო. ბიუროკრატია უნდა შემცირდეს, ხარჯები უნდა შემცირდეს და ეს ხარჯები უნდა მოხმარდეს ისეთ სფეროებს, როგორიც არის განათლება, ჯანდაცვა, თავდაცვა, პენსიებს, მასწავლებლების ხელფასებს, რომელიც უკიდურესად დაბალია. ეს სჭირდება ქვეყანას. ეს განცხადება ჯერჯერობით ჩემთვის ძალიან ბუნდოვანია, რეზულტატი გვიჩვენებს ამის უკან თუ არის ბიუროკრატიის შემცირება გადაწყვეტილი, თუ ეს მხოლოდ პოპულისტური წინასაარჩევნო დაპირება, რომელსაც არ უწერია ასრულება,“-განაცხადა ნიკა რურუამ.
ნაციონალური მოძრაობა აქცენტს 2017 წლის ბიუჯეტზეც აკეთებს და აცხადებს, რომ ადმინისტრაციული ხარჯები კიდევ უფრო გაზრდილია და ის 195 მილიონი ლარია.
„საქართველოს მართავს ივანიშვილის მარიონეტების მთავრობა და შესაბამისად ამ მთავრობაში ერთ პირს გამოცვლიან მეორეთი თუ მეორეს გამოცვლიან მესამეთი, ეს არსებითად ვერ შეცვლის მდგომარეობას,“-აცხადებს ზურაბ ჭიაბერაშვილი.