ზუგდიდში გარდაცვლილი პაციენტის არასრულწლოვანმა შვილმა ზუგდიდის რეფერალური საავადმყოფოს ექიმი გიორგი გერლიანი სცემა. ინფორმაცია ამის შესახებ , რამდენიმე წუთის წინ გავრცელდა. ,,ოდიში ნიუსის” ჟურნალისტები ადგილზე არიან მისული და უფრო დეტალურ ინფორმაციას მოკლე ხანში მოგვაწვდიან.
ამ დროისათვის არსებული ინფორმაციით, ფიზიკური ანგარიშსწორება ზუგდიდის ერთ-ერთ სუპერმარკეტთან მოხდა.
ნაცემი ექიმი ზუგდიდის რეფერალურ საავადმყოფოშია მოთავსებული, თუმცა საავადმყოფოში კომენტარს არ აკეთებენ და არც პაციენტის ჯანმრთელობის მდგომარეობაზე საუბრობენ.
გარდაცვლილის ახლობლების თქმით, 10 სექტემბერს ქირურგმა დავით გერლიანმა 42 წლის პაციენტს ვ.ზ-ს ბარიატრიული, უსისხლო ოპერაცია ჩაუტარა, რასაც გართულება მოყვა და პაციენტს პირველი არასწორი ოპერაციის შემდეგ კიდევ ხუთი დასჭირდა – მეორე -ზუგდიდში და კიდევ ოთხი თბილისში, მაგრამ მისი გადარჩენა ვერ მოხერხდა .
შინაგან საქმეთა სამინისტროს ინფორმაციით, უწყებამ ზუგდიდში მომხდარ ძალადობის ფაქტზე გამოძიება სისხლის სამართლის კოდექსის 126-ე მუხლის პირველი ნაწილით დაიწყო. პოლიციამ დანაშაულის სავარაუდო ჩამდენი არასრულწლოვანის ვინაობა დაადგინა. ტარდება საგამოძიებო ღონისძიებები.